Dünən Konfrans Liqasının 1/8 finalının ilk oyunu çərçivəsində ''Fənərbaxça'' Belçika çempionatının lideri ''Yunion''un qonağı oldu.

Bu komanda son 5 rəsmi görüşdə qalib gəlməsinə, son 20 rəsmi oyunda qol vurmasına, evdə keçirdiyi son 17 rəsmi oyunda uduzmamasına və əla formada olmasına rəğmən İstanbul nəhəngi Batşuayi, Oostervolde və Tadiçin qolları ilə 3:0 hesablı inamlı qələbə qazandı.

Bu qarşılaşmada bir sıra maraqlı göstəricilər qeydə alındı. Məsələn, ''Fənər'' tarixində ilk dəfə avrokubokların pley-offunda (qrupdan sonrakı mərhələlərdə) bir səfər oyununda 3 qol vurdu və son 13 ildə ilk dəfə Avropada pley-offa səfər qələbəsi ilə başlamış oldu. 2013-cü ildə ''sarı-lacivərdlilər'' Avropa Liqasının 1/8 finalında ilk oyunda səfərdə Plzen ''Viktoriya''sını məğlub etmişdilər (1:0). ''Yunion'' bu mövsüm rəsmi oyunlarda öz meydanında ilk dəfə 3 qol buraxdı.

Maraqlıdı ki, ötən mövsümün əvvəlindən bu yana avrokuboklarda ''Fənərbaxça''dan çox qələbə qazanan klub yoxdu. Həm ''Fənər'', həm də ''Vest Hem'' son 2 mövsümdə Avropada arenasında hamıdan çox - 19 qələbə qazanıblar.

ƏLİ