''Fənərbaxça''nın tək futbolda yox, digər idman növlərində də iddialı olması heç kimə sirr deyil.

"Football-plus.az" xəbər verir ki, bu baxımdan ötən həftəsonu bu nəhəng camiə üçün sadəcə möhtəşəm alındı. Belə ki, ''Fənər'' 7 fərqli idman növünün hamısında həftəni qalibiyyətlə başa vurdu. Gəlin, həmin qələbələrə diqqət yetirək.

* Futbolda komanda Rizə səfərində çətin şərtlər altında, gölməçəli və palçıqlı meydanda əzmkar qələbə qazandı. İsmayıl Kartalın komandası fasiləyə geridə yollansa da, ikinci hissədə 3 qol vuraraq aktivinə çox vacib 3 xal yazdı.
* Basketbolda ötən bazar günü Türkiyə kubokunun qalibi müəyyənləşdi. Həlledici görüşdə ölkə basketbolunun iki nəhəngi - ''Fənərbaxça'' ilə ''Anadolu Efes'' üz-üzə gəldi. Prinsipial rəqibini 80:67 məğlub edən ''Fənər'' tarixində 8-ci dəfə bu titula sahib çıxdı. Eyni zamanda komanda dekabrda baş məşqçi postuna gətirilən Şarunas Yasekyaviçyusun dönəmində ilk titulunu qazandı.
* Qadınlar arasında basketbol çempionatının 25-ci turunda əzəli rəqibi ''Beşiktaş''ı 100:91 məğlub edən ''Fənərbaxça'' məğlubiyyətsiz liderliyini davam etdirdi.
* Qadınlar arasında futbol çempionatında güclü rəqiblərdən sayılan ''ALG Spor''u qəbul edən ''Fənərbaxça'' hesabda geriyə düşsə də 2:1-lik əzmkar qələbə qazandı.
* Qadınlar arasında voleybol liqasında ''Fənərbaxça'' ''Nilufər Bələdiyəspor''u qəbul etdi. Yığmanın əsas ulduzu Melissa Varqasın debüt etdiyi qarşılaşmada İstanbul nəhəngi 3:0 hesablı rahat qələbə qazandı.
* Kişilər arasında voleybol çempionatında isə ''Fənərbaxça'' paytaxtda ''Ziraat Bankkart''ın qonağı oldu. Rəqibini 3:0 məğlub edən İstanbul nəhəngi bu mövsüm 20-ci rəsmi oyunda 19-cu qələbəsini qazandı.
* Və nəhayət, kişilər arasında əlil arabasında basketbol üzrə çempionatda ''Fənərbaxça'' səfərdə ''Bursaspor'' üzərində 111:54 hesablı inamlı qələbə qazandı. Bu turnirdə də ''Fənər'' məğlubiyyətsiz liderliyini davam etdirir.

ƏLİ