Dünən Türkiyə çempionatının 14-cü turunda maraqlı nəticələr qeydə alındı.

Lider ''Fənərbaxça'' evdə ''Girəsunspor'' ilə qarşılaşmada uzun müddət hesabda öndə olsa da, sürpriz məğlubiyyətlə üzləşdi (1:2). Amma ''Fənər''in Joao Pedronun qırmızı vərəqə alması ilə 40-cı dəqiqədən etibarən azlıqda oynadığını da bildirək. ''İstanbul BŞ'' – ''Qalatasaray'' qarşılaşmasında da gözlənilməz nəticə qeydə alındı. Düzdü, ''Qalatasaray''ın qalib gəlməsində qeyri-adi bir şey yoxdu. Amma bu qələbənin 7:0 hesabı ilə əldə olunacağını az adam gözləyərdi. Kərəm Aktürkoğlu het-trik etməklə matça damğa vurdu. İstanbul nəhəngi superliqada sonuncu dəfə 2018-in martında səfərdə ''Karabükspor''la oyunda 7:0 hesabı ilə qalib gəlmişdi. Okan Buruk məşqçi karyerasının ən böyükhesablı qələbəsini qazandı. Eyni zamanda ''İstanbul BŞ'' elitada ilk dəfə bir matçda 7 top buraxdı. Elə Əmrə Belözoğlu da məşqçi karyerasında daha öncə belə rüsvayçı məğlubiyyətlə üzləşməmişdi. Onun çalışdırdığı klublar indiyə qədər maksimum 3 top buraxmışdı. ''Qalatasaray''ın səfər performansı diqqət çəkir. Komanda bu mövsüm superliqada səfərdə keçirdiyi 8 qarşılaşmanın 6-da qapısını toxunulmaz saxlayıb və bu oyunlardan 5 qələbə, 2 heç-heçə, 1 məğlubiyyətlə ayrılaraq 17 xal toplayıb. Bu, son 17 mövsümün ən yaxşı göstəricisidi. ''Cim-Bom'' sonuncu dəfə səfərdəki ilk 8 oyunda bundan daha çox xalı (19) 2005/06-da toplamışdı.

Onu da bildirək ki, bu nəticələrdən sonra ''Qalatasaray'' lider ''Fənərbaxça'' ilə xal fərqini 2-yə endirdi.