Dünən Türkiyə çempionatının 32-ci turu çərçivəsində "Fənərbaxça" çətin Sivas səfərində bütün ikinci hissəni azlıqda keçirməsinə baxmayaraq 3:1 hesabı ilə qalib gəldi.

"Football-plus.az" xəbər verir ki, qırmızı vərəqə alan İrfan Can Kahveci özünü pis tərəfdən göstərdisə, 2 qol vuran Fərdi Kadıoğlu komandasının qəhrəmanına çevrildi. İstanbul nəhəngi bu nəticə ilə superliqada ardıcıl 5-ci səfər qələbəsini qazandı. Bu da o deməkdi ki, Jorje Jezuş Zikodan (2007/08) bu yana "Fənər"in başında ardıcıl 5 səfər qələbəsi qazanan ilk əcnəbi mütəxəssis oldu! İstanbul nəhəngi üçün bu oyunda daha bir neçə maraqlı göstəricilər qeydə alındı. Məsələn, ''Fənər'' bu mövsüm superliqada 13-cü dəfə bir oyuna ən azı 3 qol vurdu. Bu, son 12 ilin ən yaxşı nəticəsidi. ''Sarı-lacivərdlilər'' bundan daha yüksək göstəriciyə (14 oyun) sonuncu dəfə 2010/11-də nail olublar. Bundan başqa "Fənər" 2017/18-dən bu yana ilk dəfə ''Sivasspor''u mövsümün hər iki oyununda məğlub etməyi bacardı. İlk dövrədə İstanbuldakı qarşılaşmada "Fənərbaxça" Valensiyanın penaltidən vurduğu qolla minimal hesabla qalib gəlmişdi. Bu nəticədən sonra zirvədə xal fərqi 3-ə endi. Amma 1 oyun az keçirən lider "Qalatasaray" bu gün səfərdə "Beşiktaş"la qarşılaşacaq.