Ronaldo yubiley matçında ''Əl-Nəsr''ə qələbə qazandırdı

Avropada olduğu kimi Asiyada da Çempionlar Liqasında 1/8 final mərhələsinin oyunları keçirilir.

Kriştiano Ronaldonun şərəfini qoruduğu Səudiyyə Ərəbistanı təmsilçisi ''Əl-Nəsr'' dünən bu mərhələnin ilk oyunu çərçivəsində bu ölkənin digər təmsilçisi ''Əl-Feyhə''nin qonağı oldu. Portuqaliyalı superulduzun 81-ci dəqiqədə vurduğu qol ''Əl-Nəsr''ə minimal hesablı qələbə qazandırdı. Mükəmməl formada olan 39 yaşlı Ronaldo qollarını sıralamaqda davam edir. O, ardıcıl 6-cı rəsmi qarşılaşmada meydanı qolsuz tərk etmədi və bu müddətdə 7-ci topunu vurdu!

Bu matçda Ronaldonun karyerasına aid bəzi maraqlı statistik detallar qeydə alındı. Belə ki, Kriştiano klub karyerasında yubiley - 1000-ci oyununu keçirdi və 746-cı qolunu vurdu. Daha bir maraqlı fakt odu ki, o, penaltiləri saymasaq, peşəkar karyerasında 713-cü qolunu vurdu və bu göstəricidə əbədi rəqibi Lionel Messiyə çatdı. Ümumilikdə Ronaldonun karyerası ərzində 1205 oyunda 874 qol, Messinin isə 1047 oyunda 821 qol vurduğunu bildirək.

ƏLİ