Turnir cədvəlində üst pillələrində qərarlaşan rəqiblərin dueli xal baxımından çox önəmli idi.

Qalib liderlər qrupuna qoşulacaq, məğlub olan isə aşağı yuvarlanacaqdı. Bir gün öncə “Karvan”ın MOİK-dən 3 xal alaraq, 4-cü pilləyə yüksəlməsi də intriqanı artırmışdı. Yeri gəlmişkən, U-21-in baş məşqçisi Samir Əliyevlə köməkçisi Emin İmaməliyev də oyunu izləyənlər arasındaydı.

Oyun qarşılıqlı hücumlarla başladı. 15-ci dəqiqədə qonaqlar Xəzər Mahmudovla qola yaxın oldu. Lakin onun baxımlı zərbəsi qapıdan aralı keçdi. Meydan sahiblərinin buna cavabı 29-cu dəqiqədə gəldi. Vüsal Əsgərovun yerinə yetirdiyi cərimə zərbəsi təhlükəli alınsa da, dəqiq olmadı. Hesab isə 31-ci dəqiqədə açıldı. Xəzər ikinci cəhddə adını tabloya yazdırdı. 2-ci hissə də eyni ssenari ilə start götürdü. “İmişli” bir neçə dəfə “İrəvan”a həyəcanlı anlar yaşatdı. Lakin Andrey Sinenka fərqin artmasına imkan vermədi. Qapıçı 56-cı dəqiqədə İsayevin qüvvətli zərbəsini də dəf etməyi bacardı. 69-cu dəqiqədə meydan sahibləri hesabı bərabərləşdirdi. Bəşir Ayralovun cinah asmasını Fəhmin Muradbəyli başla tamamladı – 1:1. Lakin aranlılar özündə güc taparaq qələbə topunu vurmağa nail oldu. 87-ci dəqiqədə Xəqani Sadıxov gözəl zərbə ilə komandasına üç xal qazandırdı. Bununla da xalını 23-ə çatdıran “İmişli” 3-cü pilləyə yüksəldi. “İrəvan” isə 6-cı pilləyə endi.

Bu oyunda qəribə hadisə baş verdi. Belə ki, fasilədən sonra meydan sahibləri heyətdə dəyişiklik etmək istədi. Nazim Süleymanov 22 nömrəli futbolçunu meydana buraxdı. Lakin ehtiyat hakim görüşü başlatmamaqla bağlı referiyə xəbərdarlıq etdi. Çünki həmin oyunçunun adı iştirak ərizəsində yox idi. Yəni Nazim bəy adı protokolda olmayan futbolçunu meydana buraxmaq istəyirdi. Təxminən 5 dəqiqə çəkən müzakirədən sonra hakimlər mütəxəssisi başa salmağı bacardı və meydana Fəhmin Muradbəyli çıxdı.

Süleymanov oyundan sonra bizə bunları dedi: