Turnir cədvəlində yanaşı pillələrdə qərarlaşan “Turan Tovuz”la “Sabah” duelinə azarkeş marağı böyük idi.

Yerli publika oyundan 40-50 dəqiqə əvvəl tribunaları doldurmuşdu. Qonaq tribunasında isə təxminən 15-20 “Sabah” azarkeşi yer almışdı. Oyun qarşılıqlı hücumlarla başladı. Artıq 4-cü dəqiqədə Paçunun ötürməsini Nəbiyev qolla tamamlasa da, VAR oyundankənar vəziyyət qərarı verdi. 8-ci dəqiqədə müdafiəçilərlə qapıçının anlaşmazlığından faydalanan Volkov hesabı açdı. Qoldan sonra meydan sahibləri fəallığı artırdı. Tovuzluların irəli şığımasından faydalanan “Sabah” 26-cı dəqiqədə fərqi artırdı. Ələskərovun cinahdan asmasını Volkov qolla tamamladı. Meydan sahibləri istəyinə 33-cü dəqiqədə çatdı. Marandiçiyə qarşı qayda pozuntusu penalti ilə nəticələndi. Topun arxasına keçən Nəbiyev zərbəni dəqiq yerinə yetirdi – 1:2. Bundan sonra özünəinamı qaytaran “Turan Tovuz” futbolçuları daha bir qol üçün irəli atıldı. Conun zərbəsini qapıçı dəf etdi. Hücumlarının sayını artıran qərblilər 37-ci dəqiqədə hesabı bərabərləşdirdi. Cərimə meydançasında yaranan qarışıqlıqdan istifadə edən Qonçalves adını tabloya yazdırdı. Paytaxt təmsilçisinin buna cavabı gecikmədi. 42-ci dəqiqədə Volkov het-trikini rəsmiləşdirdi.

İkinci yarı nisbətən sönük keçdi. 48-ci dəqiqədə Qonçalvesin zərbəsi qapıdan aralı keçdi. Hissənin startında qonaqlar da qola yaxın oldu. Camalov qapını dəqiq nişan ala bilmədi. Bir neçə dəqiqə sonra yenidən tovuzlular irəli atıldı. 64-cü dəqiqədə Quseynovun zərbəsi dəqiq olmadı. 75-ci dəqiqədə Sekidika uzun reydini zərbə ilə tamamladı. Lakin top qapıdan aralı keçdi. Meydan sahibləri son dəqiqələrdə hamılıqla irəli atılsalar da, hesabı bərabərləşdirmək mümkün olmadı. Bununla da “Sabah” xalını 16-ya çatdıraraq “Turan Tovuz”u geridə qoydu.

Gözdən qaçmadı
* “Sabah”ın azarkeş qrupu “Soldati di Sabah” Tovuza gəlməmişdi.
* Matçdan öncə Tovuzdan olan şəhidlərin xatirəsi birdəqiqəlik sükutla anıldı.
* Oyunun startından 13 dəqiqə öncə stadionda işıqlar 10-15 saniyəlik söndürüldü. Diktor həddən artıq enerji yüklənməsi olduğunu söylədi.
* Het-trik edən Volkov topu özünə götürdü.
* Matçdan sonra “Sabah” azarkeşlərinin açdığı bayraqlardan birini tovuzlu azarkeş ələ keçirdi.

İSMAYIL XEYRULLAYEV