Səfərdə qazanılan 2:1-lik qələbənin ardından, təbii ki, “Zirə” üstün tərəf sayılırdı.

Oyuna da elə meydan sahibləri daha fəal başladı. Hətta ilk təhlükəli vəziyyət qolla nəticələndi. İsayevin cinah asmasında top Abbas İbrahimin önünə düşdü. Nigeriyalının qüvvətli zərbəsi yolüstü Almeydaya da toxunub qapıdan keçdi – 1:0. 13-cü dəqiqədə “Zirə” daha bir dəfə fərqlənməyi bacarsa da, VAR Sadıxovun qolunu qeydə almadı. Buna səbəb Rəhimin ötürmə zamanı oyunkənar vəziyyətdə olması idi. Qonaqların buna cavabı isə 24-cü dəqiqədə gəldi. Almeydanın başla zərbəsi qapıdan az fərqlə yan keçdi. Çox keçmədən Nəbiyevin cərimə zərbəsi təhlükəli alındı. Onun birbaşa qapıya yönəltdiyi topu Silva dəf etməyi bacardı. Əvəzində meydan sahibləri fərqi 2 topa çatdırdı. Sumanın mükəmməl ötürməsini Sadıxov qolla tamamladı.
İkinci yarı da eyni ssenari ilə başladı. 49-cu dəqiqədə Sumanın zərbəsi yadda qaldı. Lakin o topu qapıdan yan vurdu. Hissənin ortalarında artıq rollar dəyişdi. “Səbail” hücumlarının sayını artırdı. Bunların birində Nəbiyevin cərimə zərbəsi yenidən təhlükəli alındı. Amma bu duelin də qalibi Silva oldu. 59-cu dəqiqədə müdafiədəki səhvdən yararlanan Najahın zərbəsi dəqiq olmadı. 71-ci dəqiqədə Nunonun cinah asmasını Ramalinqom başla tamamlasa da, qapıçı etibarlı oynadı. Qol imkanlarından yararlana bilməyən “Səbail” əvəzində 3-cü dəfə topu tordan çıxarmalı oldu. Meydana sonradan çıxan Utziq həm yeni komandasında ilk qolunu vurdu, həm də oyunda son nöqtəni qoydu. Bundan sonra hücumlarını daha da artıran qonaqlar müdafiədə ciddi boşluqlar verdi. Belə epizodlarda Nuriyevlə İsayevin zərbələri təhlükəli olsa da, hesab dəyişmədi – 3:0. Bununla da iki oyunun cəmində 5:1 hesablı qələbə qazanan “Zirə” “Səbail” səddini adlamağı bacardı.

Gözdən qaçmadı
* “Zirə”nin zədəli futbolçusu Rüstəm Əhmədzadə ilə “Səbail”in bir neçə aydı yaşıl meydandan kənarda qalan oyunçusu Ağabala Ramazanov görüşü tribunadan izləyirdi.
* “Zirə”nin baş məşqçisi Rəşad Sadıqov yenə hakimlikdən razı qalmadı, oyunboyu etirazını kəskin şəkildə bildirdi.
* “Qartallar” oyunun sonluğunda “Səbail”in şəninə “gəmi batdı, qayıt məhləyə” şüarını səsləndirirdi.

İSMAYIL XEYRULLAYEV