Turnir cədvəlində üst pillələrində qərarlaşan komandaların dueli maraqla gözlənilirdi. “Səbail” qələbə qazanıb mövqeyini yaxşılaşdırmaq, “Zirə” isə xal sayını artıraraq rəqiblərindən uzaqlaşmaq niyyətindəydi.

Son 5 çempionat oyununda qola həsrət qalan qəsəbə təmsilçi həm də bu uğursuz seriyanı bitirmək istəyirdi. Komanda sonuncu dəfə ötən il noyabrın 12-də “Qəbələ”nin qapısına yol tapıb – 1:0. Rəşad Sadıqovun yetirmələri buna qədər “Sumqayıt” (0:0), “Neftçi” (0:1), “Araz-Naxçıvan” (0:0), “Turan Tovuz” (0:1) və “Qarabağ” (0:1) ilə oyunlarda fərqlənə bilməmişdi.

Ölkə futbolunun yaralı yeri olan azarkeş məsələsi isə yenə də özünü göstərdi. Tribunalar ölü sükuta qərq olmuşdu. Yalnız “Dənizçilər” və “Qartallar” fanklubları iş başında idi. Onların da sayı 100-ü keçməzdi. “Zirə”nin yeni transferlər – Rafael Utziqlə Ceyhun Nuriyev debüt şansı qazandı. Rəşad Sadıqov onların hər ikisini start heyətində meydana buraxdı.

Tərəflər ilk dəqiqələrdən hücuma atıldı. 3-cü dəqiqədə Rəhim Sadıxovun ötürməsini Utziq zərbə ilə tamamladı. Çox keçmədən Sadıxov yenidən diqqət mərkəzinə düşdü. İbrahimdən topu alan “Zirə”nin 10 nömrəsinin zərbəsi az fərqlə qapıdan yan keçdi. “Səbail” isə ilk təhlükəli hücumunu 21-ci dəqiqədə yaratdı. Lakin Almeydanın cərimə meydançasının kənarından vurduğu zərbə dəqiq olmadı. Bir qədər sonra yenidən “qartallar” hücuma atıldı. Nuriyev qapıçı ilə üz-üzə qalsa da, topu qapının üstündən vurdu. Hissənin sonlarında meydan sahibləri üstünlüyü ələ almağa, epizodlar yaratmağa çalışdı. Bunların birində Nəbyevin asmasını Almeyda başla tamamladı. Lakin zərbədə dəqiqlik çatmadı.

İkinci yarı da eyni ssenari ilə başladı. Hissənin startında Almeydanın ötürməsini Məhərrəmli qapasa da, onun zərbəsi qapının üstündən keçdi. 59-cu dəqiqədə qonaqlar qola yaxın oldu. Sumanın cərimə zərbəsindən vurduğu topu Quliyev dəf etdi. Oyunun ən real qol vəziyyəti isə 77-ci dəqiqədə yaşandı. Nuriyevin birbaşa qapıya endirdiyi cərimə zərbəsi tirə tuş gəldi. Dönən topu “Zirə” futbolçuları bir neçə dəfə qola çevirmək istəsə də, müdafiəçilər qapı qarşısında “ətdən divar hördü”. 80-ci dəqiqədə isə görüşün baş hakimi Fərid Hacıyev qonaqların penaltisini vermədi. VAR-a müraciət edən referi nəticədə qayda pozuntusunun olmadığı qərarını gəldi. Matçın sonluğu “Səbail”in hücumları şəraitində keçdi. Luqasinin zərbəsi təhlükəli alınsa da, qapıçı hesabın açılmasına imkan vermədi.
Beləliklə, nə qalib müəyyənləşdi, nə də “Zirə”nin uğursuz seriyası başa çatdı. “Qartallar” xalını 30-a çatdıraraq yenidən 2-ci pilləyə qayıtdı. “Dənizçilər” isə 5-ci yerdə qərarlaşdı.

Gözdən qaçmadı
* “Səbail” xalq artisti Hacı İsmayılovun 80 illik yubileyini unutmadı, tribunada bununla bağlı pankart asdı.
* Amil Yunanovun gedişindən faydalanan Ramalinqom istədiyi 9 nömrəli formaya axır ki yiyələndi.
* 12-ci dəqiqədə yan xətt hakiminin qərarına əsəbləşən Rəşad Sadıqov “Allah haqqı ayıbdı, bəsdi bu qədər, hər dəfə bizə qarşı belə edirsiz”, - deyə etiraz etdi.
* Adil Nağıyevin qayda pozuntusundan sonra “Qartallar” fanklubu “Adil evinə, futbol sənin nəyinə” şüarını səsləndirdi.

İSMAYIL XEYRULLAYEV