Mərdəkanda titul və avrokubok ümidlərini ölkə kubokuna yönəldən komandaların dueli baş tutdu.

Oyuna maraq yox dərəcəsində idi. Tribunalarda, sadəcə, meydan sahiblərinin azarkeş qrupu olan “Sektor 85”i görmək mümkün idi. “Qəbələ” fanatları isə oyuna gəlməmişdi.

Oyun qonaqların üstünlüyü ilə başladı. Elə ilk təhlükəli vəziyyəti də onlar yaratdı. Xalaylanın baxımlı zərbəsi qapı dirəyindən dönsə də, Tetteh doğru zamanda doğru yerdə idi – 1:0. Qoldan dərhal sonra irəli atılan naxçıvanlılar oyunda dönüş yaratmağa çalışdı. Cərimə zərbəsindən gələn topu Maşike başla qapıya göndərdi. Lakin Əzizli zərbəni küncə çıxardı. 27-ci dəqiqədə baş hakim Qırtımovun Meloya toxunuşunu penalti kimi qiymətləndirdi. Amma Manafov topu qapının üstündən vurdu. Hissənin son dəqiqələrində Azər Bağırovun yetirmələri fəallığını daha da artırdı. Öncə Kadirinin cərimə zərbəsi təhlükəli alındı. Ardından Muhammedin zərbəsini qapıçı dəf etdi. Lakin dönən top Maşikenin önünə düşdü. Konqolu forvard bu fürsəti boşa vermədi – 1:1.

İkinci yarıya yenə “qırmızı-qaralar” üstün başladı. 55-ci dəqiqədə Tetteh dublunu rəsmiləşdirməyə yaxın oldu. Onun qüvvətli zərbəsi qapı tirindən döndü. Meydan sahiblərinin buna cavabı özünü gözlətmədi. 60-cı dəqiqədə Manafovun aşırma zərbəsi dəqiq olmadı. Hissənin ortalarında qonaqlar azlıqda qaldı. Afriko Kadiriyə qarşı kobudluğa görə birbaşa qırmızı vərəqə ilə cəzalandırıldı. Buna baxmayaraq, “Qəbələ” 10 nəfərlə də pis oynamadı. Hətta komanda 86-cı dəqiqədə qola da yaxın oldu. Xalaylanın zərbəsi qapıçını da keçdi. Lakin Manafov son anda topu boş qapıdan çıxardı. Beləliklə, qalib müəyyənləşmədi. Bu isə o deməkdi ki, cütün taleyinə Qəbələdə aydınlıq gələcək.

Gözdən qaçmadı:
* “Araz-Naxçıvan”ın baş məşqçisi Azər Bağırov bəzi epizodlarda kəskin şəkildə etiraz edirdi.
* Meydan sahiblərinin köməkçi məşqçisi Rail Məlikov oyunu ayaqüstə izlədi.

İSMAYIL XEYRULLAYEV