Ölkə kubokunun 1/8 finalı çərçivəsində keçirilən görüşdə rəqiblər mübarizə əzmini ortaya qoydular.

Meydan sahubləri ilk dəqiqələrdən üstünlüyü ələ aldı. İlk təhlükəli vəziyyəti də onlar yaratdı. 37-ci dəqiqədə Ninqa cərimə meydançası daxilindəki qarışıqlıqdan istifadə edərək topu qapıya göndərsə də, qapıçı Şahin Zəkiyev ayıqlığı itirmədi. İlk hissədə başqa real qol vəziyyəti yaranmadı. İkinci hissəyə də meydan sahibləri üstün başladı. Lakin ilk təhlükəli vəziyyəti qonaqlar yaratdı. “Karvan”ın vingeri Kinqs cərimə meydançası daxilində qapıçıyla üzbəüz vəziyyətdə ötürmə versə də, Akif Tağıyev bu topa yetişə bilmədi. Görüşdə hesab 55-ci dəqiqədə açıldı. İkinci hissədə meydana çıxan Kamran Aliev Səbuhi Abdullazadənin ötürməsini qola çevirməyi bacardı. Bu qoldan sonra qonaqlar bir qədər canlandı. 65-ci dəqiqədə ötürmə ilə küncdən zərbəni yerinə yetirdikdən sonra cərimə meydançasına göndərilən topu İzzət Müştaqov başla qapıdan keçirməyə nail oldu. “Karvan”ın oyunçularının ruhlanması 66-cı dəqiqədə də öz bəhrəsini verməyə yaxın idi. Akif Tağıyev topu rəqib müdafiəçidən alsa da, bir qədər ləng davrandı. Qarşılıqlı hücumlar şəklində davam edən oyunda sükut növbəti dəfə 82-ci dəqiqədə pozuldu. Sonradan oyuna qoşulan estoniyalı Sorqa cərimə meydançası daxilində ona göndərilən topu başla boş qapıdan keçirməyi bacardı. Bu qol oyunun qırılma nöqtəsi oldu. Kənan Kərimovun yetirmələrinin motivasiyası aşağı düşdü. Bir neçə epizod yartmağa çalışsalar da, əllərindən heç nə gəlmirdi. Abasovun komandası isə dayanmadan rəqibin qapısı qarşısında hücumlar təşkil edirdi. 88-ci dəqiqədə rəqibin cərimə meydançasının yaxınlığında Ninqanın yerə yıxılması hakimin fitinə səbəb oldu. Sərbəst vuruşu yerinə yetirən Rövlan Muradov topu qapıya göndərərək baxımlı qola imza atdı. Beləliklə, oyun “Sumqayıt”ın qələbəsi ilə başa çatdı. Samir Abasovun yetirmələri bu qələbə sayəsində 1/4 finala vəsiqəni təmin etdi.