“Zirə”ni bu oyunda qələbəyə səsləyən ən müxtəlif amillər var idi.

Birincisi, “qartallar” son 4 oyunda qələbəyə həsrət qalmışdı, ikincisi, onlar indiyə qədər evdə “Qarabağ”a qalib gələ bilməmişdi, üçüncüsü, komandalar arasında xal fərqi 9-a bərabər idi deyə, çempionluq istəyən komanda bu fərqi aradan qaldırmağa çalışmalıydı. Nəhayət, hər iki tərəf qış fasiləsinə yaxşı əhval-ruhiyyədə yollanmaq istəyirdi.

Oyunun əvvəli kəşfiyyat xarakteri daşıdı. 7-ci dəqiqədə Tyyaqonun irəli çıxdığını görən Juninyo uzaqdan zərbə ilə qapını yolasa da, top yandan keçdi. "Zirə"nin cavabı gecikmədi. Məqsədin qapı önünə asmasına zamanı Suma dəqiq zərbə vura bilmədi. 30-cu dəqiqədə Zubir – Toral - Juninyo kombinasiyasının ardından “sambaçı” hesabı açdı.
Qonaqlar 2-ci yarıya fəal başladı. Patrikin zərbəsi zamanı Tyaqo seyv etdi. Qolkiper Zubirin də sevinməsinə imkan vermədi. Təxminən 20 dəqiqə "Qarabağ" top saxladı. 64-cü dəqiqədən etibarən meydan sahibləri tədricən topa nəzarət etməyə başladı. Sumanın cəhdi bərbad alındı. Bir qədər sonra qvineyalının iti bucaq altından zərbəsini Lunyov kornerə çıxardı. Qonaqlar buna Toralın hücumuyla cavab versə də, qapıçı yerindəydi. 70-ci dəqiqədə Rüstəm təkbaşına uzun məsafə qət edib qapını yoxlasa da, Bəhlul özünü topa sipər etdi. Bir qədər sonra Aka başla zərbə vurdu, Elvin topu boş qapıdan çıxardı. 87-ci dəqiqədə Rəhim Renato ilə Rüstəmin cərimə meydançasına “açıldıqlarını” görüb gözəl ötürmə verdi, zirəlilərin zərbə vurmasına son anda Veşoviç əngəl oldu. Ardınca Akanın baş zərbəsi qapının üstündən keçdi.

Gözdən qaçmadı
* Zirəyə 100-dən çox "Qarabağ" azarkeşi gəlmişdi.
* 75-ci dəqiqədə Məqsəd sürətli hücuma çıxarkən Elvin onun qarşısını kobudluqla kəsdi. Hakim qayda pozuntusu qeydə alsa da, əlini cibinə salmadı, "Qarabağ"ın müdafiəçisinə 2-ci “sarı”nı vermədi. Bunu görən Rəşad Sadıqov əvvəlcə 4-cü hakimə narazılığını bildirdi. Sonra isə uca səslə "sənə ayıbdı, Cavid" dedi.
* Qismət Alıyev oyundan sonra formasını azarkeşlərə verdi.

ABDULLA İSMAYILOĞLU