Turnir cədvəlində yanaşı pillələrdə qərarlaşan “Araz-Naxçıvan”la “Səbail”in duelinə azarkeş marağı aşağı idi.

Elita oyununda tribunalara cəmi 120 azarkeş toplaşandan sonra bu ölkədə futbolun sevildiyi ilə bağlı kəlmələrə kimi inandırmaq olar ki?! Hər halda, boş qalmayan tribunalarda yalnızca “Sektor 85” və “Dənizçilər” fanklublarını görmək mümkün idi. Oyun meydan sahiblərinin üstünlüyü şəraitində başladı. İlk təhlükəli hücum da Naxçıvan təmsilçisindən gəldi. Azzauinin çərçivəyə gedən zərbəsi komanda yoldaşı Orxan Əliyevə toxunaraq qapıdan yan keçdi. Çox keçmədən hesab açıldı. Vadim Abdullayevin ötürməsindən sonra topa yiyələnən Kadiri 4 nəfərin əhatəsindən çıxaraq toru silkələdi – 1:0. Qoldan dərhal sonra irəli atılan “Səbail” “Araz-Naxçıvan”a həyəcanlı anlar yaşatdı. Qomisin təxminən 22 metrdən endirdiyi zərbəni Avram küncə çıxardı. Hücumların birində isə Valdemar Almeydanın cinah asmasını qapayan Yusif Nəbiyev topu qapının üstündən vurdu.

İkinci yarı da eyni ssenari ilə başladı. “Neftçi” ilə görüşdə komandasını məğlubiyyətdən xilas edən Orxan Əliyev bu qarşılaşmada real qol şanslarını dəyərləndirə bilmədi. Qonaqların heyətində isə ən parlaq sima Səlahət Ağayev idi. Qolkiper bir neçə vəziyyətdə fərqin artmasına mane oldu. 61-ci dəqiqədə Orxan Əliyevin zərbəsi qapıçını keçsə də, Nəbiyev topu boş qapıdan çıxardı. Hissənin ortalarında oyunu bərabərləşdirən “Səbail” istəyinə matçın sonlarında nail oldu. Yunanovla mübarizə zamanı Kurdiçin tərs toxunuşu qolla nəticələndi – 1:1.

Gözdən qaçmadı:
* İkinci hissənin startı 6 dəqiqə yubandı. Buna səbəb media sektorundan solda yerləşən qapının torunda problem olması idi.
* Matçın ikinci yarısında qazondakı problemlər özünü göstərirdi. Epizodlardan birində nominal meydan sahiblərinin baş məşqçisi Azər Bağırov qazondan qopan ot parçasını əli ilə yerinə qoydu.
* Əvəzetmə zamanı meydanı tərk edən Valdemer Almeyda komanda yoldaşı Yadin Luqasinin yanına gəlməyərək birbaşa ehtiyat oyunçular skamyasına yollandı.

İSMAYIL XEYRULLAYEV