''Beşiktaş'' transferdəki susqunluğa son qoyaraq bu qış heyətini ikinci futbolçu ilə gücləndirib.

Bir müddət öncə ''Adana Dəmirspor''dan ayrılan Yonas Svennsonu heyətinə qatan İstanbul nəhəngi bu dəfə ''Nottingem Forest''dən Co Uorrallı mövsümün sonuna qədər icarəyə götürüb. ''Qartal'' bu futbolçunu daimi əsasda transfer edə bilmək hüququnu da ələ keçirib.

Premyer-liqa təmsilçisinə icarə haqqı ödənilməyəcək. Uorrallın özünə isə ikinci dövrə üçün 600 min avro məvacib veriləcək. 193 sm boya malik 27 yaşlı Uorrall mərkəz müdafiəçisidi. 2015-ci ildən ''Nottingem Forest''in şərəfini qoruyan və arada bir mövsümü (2018/19) ''Reyncers''də keçirən bu futbolçu cari mövsüm 9 rəsmi oyuna çıxıb. Son dönəmlərdə ''Beşiktaş''ın ingiltərəli futbolçulara marağı artıb. Ötən mövsüm bilindiyi kimi heyətdə Dele Alli də var idi. Amma bu futbolçu ümidləri doğrulda bilməmişdi. Cari mövsümün əvvəlində isə Aleks Oksleyd-Çemberleyn transfer edilmişdi. Təcrübəli futbolçu ilk dövrədə pis təsir bağışlamasa da, çox şanssız zədə ilə üzləşdi. Onun bu mövsüm bir daha oynayacağı gözlənilmir.

ƏLİ