“Beşiktaş”ın ingiltərəli oyunçulara marağı davam edir.

"Football-plus.az" xəbər verir ki, İstanbul nəhəngi ötən yay Natan Redmond və Dele Allini heyətinə qatmışdı. Hər iki futbolçu artıq klubdan ayrılıb. Redmond oyunu ilə yaddaşlarda iz buraxsa da, Alli ümidləri doğrultmadı. İndi də “Qartal” Aleks Oksleyd-Çemberleni transfer etməyə yaxındı. 29 yaşlı vinger uzun illərdi şərəfini qoruduğu “Liverpul”dan artıq ayrılıb və azad agent statusundadı. Əslində “Beşiktaş” rəhbərliyi uzun müddətdi bu futbolçu ilə maraqlanır. Hətta şayiələrə inansaq, başqan Ahmet Nur Çəbi özü şəxsən İngiltərəyə yollanmış və Oksleyd-Çemberlen ilə görüşərək onunla danışıqlar aparmışdı. “Beşiktaş”ı qorxudan və transferi yubadan məqam isə futbolçunun zədəyəmeyilli olmasıdı. O, son 3 ildə zədə üzündən premyer-liqada cəmi 39 oyun keçirib. “Beşiktaş” rəhbərliyi bu oyunçunun durumu ilə bağlı hətta “Liverpul”un tibbi personalı ilə də məsləhətləşməli olub. “Qırmızılar”ın baş həkimi Endryu Messi istanbulluları əmin edib ki, Oksleyd-Çemberlen artıq zədələrdən qurtulub və hazırda onun oynamasına mane ola biləcək hansıa problem yoxdu. Hadisələrin belə axarından sonra “Beşiktaş” tanınmış oyunçunu Türkiyəyə dəvət edib. Oksleyd-Çemberlenin həm müqavilənin detallarını razılaşdırmaq, həm də tibbi müayinədən keçmək üçün bu gün İstanbula gələcəyi gözlənilir.

Qeyd edək ki, Oksleyd-Çemberlen “Sauthempton”un yetirməsidi. Onun ulduzu 2011-ci ildə 13,8 milyon avroya transfer olunduğu “Arsenal”da parladı. Burda 6 mövsüm top qovduqdan sonra 2017-də 38 milyon avroya “Liverpul”a yollandı. Mersisaydlıların heyətində ilk illərdə pis təsir bağışlamasa da, son dönəmlərdə zədələr ona özünü göstərməyə mane oldu. “Liverpul”un heyətində həm ÇL-in, həm də premyer-liqanın qalibi olan Oksleyd-Çemberlen İngiltərə yığmasında keçirdiyi 35 oyunda 7 qol vurub.