Ötən ilin sonlarında Erik Bayi ilə vidalaşan ''Beşiktaş'' daha bir futbolçu ilə yollarını ayırıb.

“Football-plus.az” xəbər verir ki, söhbət Jan Onanadan gedir. Kamerunlu yarımmüdafiəçi mövsümün əvvəlində 4 milyon avroya ''Lans''dan transfer edilmişdi. Hər halda 4 milyon avro az məbləğ deyil və fanatlar da təbii ki, bu futbolçudan çox şey gözləyirdilər. Amma ilk oyunlardan bəlli oldu ki, Onana klub tarixinin ən fiasko transferlərindən biridi. Onun ''Beşiktaş'' səviyyəsində futbolçu olmaması mövzusu fanatlar arasında çox müzakirə olundu. Klubun sabiq yönəticilərindən biri isə iddia etmişdi ki, ''Beşiktaş'' yayda yanlış Onananı transfer edib. Guya rəhbərlik bu futbolçu ilə başqasını səhv salıb. Dekabrın əvvəllərində 24 yaşlı futbolçu daha 4 oyunçu ilə birlikdə əsas komandadan kənarlaşdırılmışdı. Onana bundan sonra karyerasını ''Marsel''də davam etdirəcək. Belə ki, Fransa nəhəngi bu oyunçunu mövsümün sonuna qədər icarəyə götürüb. Fransızlar onu daimi əsasda transfer etmək hüququnu da ələ keçiriblər. Komanda bu hüquqdan yararlanmaq istəsə, 4,5 milyon avro ödəməli olacaq. ''Marsel'' icarə haqqı ödəməyəcək. Amma Onananın ''Beşiktaş''dakı qazancı mövsümün sonuna qədər fransızlar tərəfindən qarşılanacaq. Onananın bu mövsüm ''Qartal''ın heyətində 10 rəsmi matçda cəmi 188 dəqiqə oynadığını və yalnız bir məhsuldar ötürmə ilə fərqləndiyini bildirək.

ƏLİ