Bu qış yalnız diqqətçəkən satışlar həyata keçirən ''Qalatasaray'' nəhayət, heyəti gücləndirməyə başlayıb.

''Betis''ə yollanan Sedrik Bakambunun boşluğu Karlos Vinisius ilə doldurulub. 28 yaşlı hücumçu 600 min avro qarşılığında ''Fulhem''dən mövsümün sonuna qədər icarəyə götürülüb. Braziliyalı futbolçu İstanbul nəhəngində 4 aya 600 min avro qazanacaq. 2022-ci ildə ''Benfika''dan ''Fulhem''ə gələn ''sambaçı'' bu klubda ümidləri doğrulda bilmədi. Vinisius son 2 mövsümdə London təmsilçisində yalniz 48 rəsmi oyuna çıxaraq 8 qol, 3 məhsuldar ötürmə ilə fərqlənib.

İstanbul nəhənginin digər transferi isə Serj Oryedi. O, ''Bavariya''ya yollanan Saşa Boenin boşluğunu doldurmağa çalışacaq. Daha öncə ''Lans'', ''Tuluza'', PSJ, ''Tottenhem'', ''Vilyarreal''da top qovmuş təcrübəli cinah müdafiəçisi 2022-dən bu yana ''Nottingem Forest''in şərəfini qoruyurdu. 31 yaşlı futbolçu 100 min avro qarşılığında ''Qalatasaray''a transfer olunub. Onunla mövsümün sonuna qədər müqavilə imzalanıb. Bu müddətdə bu futbolçu 600 min avro məvacib qazanacaq. Bundan başqa ona 150 min avro imza parası da ödəniləcək. ''Nottingem Forest''də bu mövsüm premyer-liqada 12 oyuna çıxan və aktivinə 2 məhsuldar ötürmə yazan Orye hazırda Kot d'İvuar yığmasının heyətində Afrika Millətlər Kubokunda çıxış edir. O, turnirdə çıxışını başa vurduqdan sonra İstanbula gələcək.

ƏLİ