“Beşiktaş” daha bir futbolçu ilə yollarını ayırıb.

Bu dəfə klubu tərk edən futbolçu Valentin Rozyedi. 27 yaşlı fransalı sağ cinah müdafiəçisi vətəninə yollanıb. O, Liqa-1-in iddialı klublarından “Nitsa”ya mövsümün sonuna qədər icarəyə verilib. Korsikalılar bu oyunçunu mövsümün sonunda daimi əsasda tranfer edə bilmək hüququnu da ələ keçirib. Komanda bu hüquqdan istifadə etmək istəsə, “Beşiktaş”a 4 milyon avro ödəməli olacaq. “Nitsa” icarə haqqı ödəməyib. Amma əvəzində bu klub Rozyenin “Beşiktaş”dakı aylıq qazancını mövsümün sonuna qədər ödəmək öhdəliyini üzərinə götürüb. “Qartal” Rozyeni 2020-ci ildə “Sportinq”dən heyətinə qatmışdı. Bu futbolçu ilk iki mövsümü İstanbul nəhəngində icarə əsasında keçirəndən sonra 2022-nin yayında 4,8 milyon avroya daimi əsasda transfer edilmişdi.

“Ağ-qaralar”ın heyətində 126 rəsmi oyunda 6 qol, 18 məhsuldar ötürmə ilə fərqlənən Rozye Türkiyədə oynadığı müddətdə ölkə çempionluğu da daxil olmaqla 3 titul qazandı. Bununla da “Beşiktaş”da dekabrın əvvəllərində əsas komandadan kənarlaşdırılan 5 futbolçudan üçüncüsü ayrılmış oldu. Bir müddət öncə Erik Bayi (Vilyarreal) və Jan Onana (Marsel) da klubu tərk etmişdi. Digər iki futbolçu – Rəşid Gezzalla Vensan Abubakar hələ də müqavilə ilə “Beşiktaş”a məxsusdu. Gezzalın komandada qalmaq ehtimalı var. Amma rəhbərlik onun, nəhayət, zədələrdən qurtulmasını və komandaya fayda verməsini istəyir.

Yeri gəlmişkən, təcrübəli əlcəzairli vingerin müqaviləsində maraqlı bir maddənin olduğu üzə çıxıb. Gezzalın müqavilə müddəti bu yay bitməlidi. Amma həmin maddəyə əsasən o, cari mövsüm 20 rəsmi oyunda meydana çıxacağı təqdirdə müqaviləsi avtomatik birilliyə yenilənəcək! 31 yaşlı futbolçu 2023/24-də artıq 16 rəsmi oyun keçirib. Fernando Santuşun təyinatından sonra əfv edilən və əsas komandaya cəlb olunan Gezzal ən son kubokda “Eyupspor”a qarşı matçda 90 dəqiqə meydanda oldu. Abubakarı isə böyük ehtimalla bir daha “Beşiktaş”ın heyətində görməyəcəyik. Bilindiyi kimi, təcrübəli forvard hazırda Afrika Millətlər Kubokunda çıxış edən Kamerun yığmasının düşərgəsindədi. Abubakar turnirin startına az qalmış məşqlərin birində zədə almışdı. Amma onun zədəsi ciddi olmadığından Kamerun bu futbolçunu heyətdən çıxarmaq istəmədi. Abubakar turnirdən qayıtdıqdan sonra ətraflı tibbi müayinədən keçiriləcək. Zədəsi ciddi olacağı təqdirdə onun ikinci dövrə üçün müqaviləsi dondurulacaq. Əks halda isə o, başqa kluba icarəyə veriləcək.