“Atletiko” “Sevilya” ilə sentyabrın əvvəlində keçirilməli olan, ancaq ilin sonuna qalan oyunun lap əvvəlində çempionatdakı ardıcıl iki büdrəməyə görə azarkeşləri önündə bəraət qazanmaq niyyətini ortaya qoydu.

"Football-plus.az" xəbər verir ki, Xuanludan səkən topu ələ keçirən Morata De Paulla “divar pası” oynayandan sonra Dmitroviçlə təkbətək çıxsa da, bu dueldən məğlub ayrıldı. “Hindular” hücumda fəallıq göstərsə də, “Sevilya”nın qapısı önündə təhlükəli vəziyyət yaratmaqd çətinlik çəkirdilər. Demək olar ki, hücuma çıxmayan qonaqlar etibarlı müdafiə olunaraq fasiləyə qədər 0:0 hesabını qoruya bildilər. Oyunun belə axarından razı qalmayan Simeone 2-ci hissəyə iki dəyişikliklə başladı: Rikelmeni Korrea, Molinanı Lyorente əvəz etdi. Maraqlıdı ki, Lyorente meydana çıxandan cəmi 40 saniyə sonra fərqləndi. Koke cərimə meydançasında şığıyan Markosa meydanın dərinliyindən ötürmə verdi, Lyorentenin Morata göndərmək istədiyi top Ramosdan səkdi, təkrar zərbə isə qol oldu. Hesabı açan “Atletiko” geri çəkilərək gücünə qənaət etməyə başladı. “Sevilya” uzun müddət irəlidə heç nə yarada bilməsə də, nəhayət, Oblak oyuna qoşularaq Okamposun çətin zərbəsini qaytarmalı oldu. Bir neçə dəqiqədən sonra “hindular” azlıqda qaldı – yenicə meydana çıxan Çağlar Söyüncü Okamposa qarşı aşkar kobudluğa görə meydandan qovuldu. Yeri gəlmişkən, iki gün əvvəl Naço da eyni kobudluğa görə belə sərt cəzalanmışdı. Çağlar qovulanda sona hələ 20 dəqiqə qalırdı. Ancaq “Sevilya” say üstünlüyündən yararlana bilmədi. Əndəlüslər qalan vaxt ərzində də təhlükəli vəziyyət yaratmaqda çətinlik çəkdi. Əksinə, meydan sahibləri daha bir neçə dəfə fərqi artıra bilərdi. “Atletiko” bu qələbə sayəsində turnir cədvəlində “Barsa”ya çatdı. Ancaq bu iki komanda liderlərdən – “Real”la “Jirona”dan 7 xal geri qalır.

4-cü turdan təxirə salınan oyun
Atletiko – Sevilya 1:0
Lyorente, 46. (64308)
Atletiko: Oblak, Rikelme (Korrea, 46), Aspilikueta, Ximenes, Vitsel, Molina (Lyorente, 46), Lino, Koke (Söyüncü, 66), De Paul, Qrizmann (Mandava, 73), Morata (Saul, 55).
1-2. Real, Jirona – 45, 3-4. Atletiko, Barselona – 38... 15-16. Alaves, Sevilya – 16...
Bombardir: Bellingem (Real) – 13.

Oyundan sonra
Dieqo Simeone, “Atletiko”nun baş məşqçisi: “5 oyunluq sıx qrafik fonunda böyük güc sərf etməklə qələbə qazandıq. Ötən oyunda da azlıqda oynadıq, ancaq bu gün vəzifəmizin öhdəsindən gəldik. Çox yaxşı il keçirdik. 50 oyunun yalnız 8-də uduzduq, 34 qələbə qazandıq, 104 qol vurduq. Odu ki, dekabrdan dekabra qədər olan müddət çox yaxşı alındı. İrəlidə bizi mövsümün ikinci hissəsi gözləyir. Komanda böyüyür, baş rollarda oynamaq istəyir. Daha yaxşı müdafiə olunmalıyıq, fasilədə bunun üzərində çalışacağıq”.