.Güclü yağışın və şimşəyin müşayiət etdiyi oyuna “kimyaçılar” daha fəal başladı.

"Football-plus.az" xəbər verir ki, onların heyətində Rövlan, Kamran, Sorqa “üçlüy”ü rəqib müdafiəçilərə problem yaradırdı. Lakin ilk 10 dəqiqədə qapılar önündə hansısa təhlükəli vəziyyət yaşanmadı.

Zaman keçdikcə naxçıvanlılar toparlanmağa çalışırdı. Lakin “kimyaçılar” müdafiədə ehtiyatlı oynayırdı. Bəzi məqamlarda isə top heç nominal meydan sahiblərinin oyunçularında qalmırdı. İlk təhlükəli hücumu “Sumqayıt” qurdu. 26-cı dəqiqədə Səbuhinin zərbəsinin qarşısını Avram çətinliklə aldı.

Bir qədər sonra isə Kamran qola yaxın olsa da, top qapının üstündən keçdi. Hissənin sonlarına doğru “Araz-Naxçıvan”ın hücumlarının kəsəri artmağa başladı. Sol cə sağ cinahlarda yer alan Kuzmanoviçlə Nicat, mərkəzdə isə İsmayıl müdafiəni yarmağa çalışırdı. 43-cü dəqiqədə “qırmızı-ağlar” qola yaxın oldu. Azzauinin zərbəsi dirəkdən döndü. 1 dəqiqə sonra isə Orxan əlinə düşən imkandan yararlana bilmədi. İlk hissəyə əlavə olunan vaxtda Turanın cərimə zərbəsindən birbaşa qapıya göndərdiyi top tirin üstündən keçdi. Beləliklə, qarşılıqlı hücumlar şəraitində keçən ilk yarıda hesab açılmadı.

2-ci hissəyə naxçıvanlılar Mərdəkandakı təbiət hadisəsi ilə həmahəng - şimşək kimi başladı. Azər Bağırovun oyunun zəif bəndlərindən olan Kadirini Vadimlə əvəzləməsi komandanın performansına təsir etdi. 47-ci dəqiqədə Kuzmanoviçin zərbəsi qapıdan aralı keçdi. Fasilədən sonra 7 dəqiqə mərkəzi keçməkdə çətinlik çəkən “kimyaçılar” rəqibi Səbuhinin sayəsində əks-hücumda yaxaladı. Lakin yarımmüdafiəçinin zərbəsi istədiyi kimi alınmadı. Komandasının hücumdakı “dişsizliyinin” fərqinə varan Samir Abasov Eriki Kamranla əvəzlədi. Bu dəyişikliyin işə yaradığını söyləyə bilərik. Hücumların kəsərini artıran “kimyaçılar” 62-ci dəqiqədə penalti qazandı. Kurdiç cərimə meydanı daxilində Aliyevə qarşı kobud oynadı. “Nöqtə”yə yaxınlaşan Rövlan zərbəni dəqiq yerinə yetirdi.

Qoldan dərhal sonra Azər Bağırov üç yeni futbolçunu döyüşə atdı. Elvis, Tural və Nuno fərqi aradan qaldırmalıydı. Qoldan sonra həvəsdən düşməyən Muxtar Respublika təmsilçisi hücumların kəsərini artırdı. 72-ci dəqiqədə isə Turan cərimə zərbəsindən möhtəşəm qol vurdu.

Son 15 dəqiqə o qədər maraqlı keçmədi. Düzdü, “Araz-Naxçıvan” tam güclə irəli atılmışdı. Lakin “Sumqayıt” yaxşı müdafiə olunmağı bacarırdı. Arada əks-hücumlar qurmağa da cəhd edirdi. Lakin hesab dəyişmədi və komandalar hərəyə 1 xalla kifayətlənməli oldu.

Gözdən qaçmadı
* “Araz-Naxçıvan” azarkeşləri stadiona böyük Azərbaycan bayraqları ilə təşrif buyurdular. Onlar sanki futbol matçına yox, hansısa partiyaya dəstək mitinqinə gəlmişdilər.
* Oyundan əvvəl Şəhriyar Rəhimovun vaxtsız vəfatı ilə bağlı birdəqiqəlik sükut elan olundu.
* Turan Manafov fərqləndikdən sonra qol sevincini ehtiyat oyunçular skamyasının önündə sürüşərək qeyd etdi.

İLKİN SULTANLI