Turnir cədvəli baxımından önəmli qarşılaşmaya azarkeş marağı yox dərəcəsində idi.
Media sektorundakı 3-5 jurnalisti nəzərə almasaq, tribunalar səssiz-səmirsiz qalmışdı. Meydan sahibi komandanı dəstəkləyən iki nəfəri görmək mümkün idi. Qonaq sektor isə 4-cü dəqiqədə fanklub üzvlərinə qovuşdu.
Oyun qarşılıqlı hücumlarla başladı. İlk təhlükəli vəziyyəti “Araz-Naxçıvan” yaratdı. 12-ci dəqiqədə Azzaui baxımlı driblinqlə rəqibin cərimə meydançasına şığıyıb Rodrigesə ötürmə verdi. Sonuncunun qüvvətli zərbəsini İmanov dəf etdi. Çox keçmədən nominal meydan sahibləri “Sabah”a yenidən həyəcan yaşatdı. Manafovun cinah asmasına Rzayev başla zərbə endirsə də, top az fərqlə qapının yanından keçdi. Bir qədər sonra ardıcıllıqla Melo və Azzauiyə dirəklər mane oldu. Azər Bağırovun yetirmələri qol istəyinə hissənin sonlarında çatdı. Bayramlının ötürdüyü topu Letiç qüvvətli zərbə ilə öz qapısına vurdu – 1:0. Qolla birlikdə şokdan ayılan bakılılar Tillə hesabı bərabərləşdirməyə yaxın oldu. Lakin Avram onun zərbəsinin qarşısını almağı bacardı.
İkinci yarı bir qədər fərqli ssenari ilə başladı. İlk 15-20 dəqiqə qonaqlar üstünlüyü ələ alıb, hücumlar qurmağı bacardı. Bunların birində Belfodilin zərbəsi qapıdan yan keçdi. Əvəzində isə “Araz-Naxçıvan” əks-hücumlarda necə təhlükəli olduğunu göstərdi. 71-ci dəqiqədə Manafov cərimə zərbəsindən daha bir qola imza atdı – 2:0. Bundan sonra “Sabah” nə qədər çalışsa da, nəticəni dəyişə bilmədi. Ardıcıl iki qələbədən sonra məğlubiyyətlə barışan paytaxt klubunun mövsümün ilk yarısıni “5-lik”də bitirmək planı suya düşdü. “Araz-Naxçıvan” isə 5 oyunluq qələbə həsrətinə son qoydu və yenidən liderləri izləməkdədi.
Gözdən qaçmadı
* Meydan sahiblərinin azarkeş qrupu “Sektor85” komandanı dəstəkləməyə gəlməmişdi. “Sabah”ın iki azarkeş qrupu isə tribunada yerini almışdı.
* Buraxılan qoldan sonra “Soldati di Sabah” “çempionluq getdi, afərin, uşaqlar” şüarını səsləndirməyə başladı.
* Matçboyu hər iki komandanın baş məşqçisi referiyə etirazını kəskin şəkildə bildirirdi. Bunların birində özündən çıxan Musayev etiraz əlaməti kimi tərliyi əynindən çıxarıb yerə çırpdı.
* 71-ci dəqiqədə əvəzlənən Til və Letiç ehtiyat oyunçular skamyasına yox, birbaşa paltardəyişmə otağına yollandı.
İSMAYIL XEYRULLAYEV