''Beşiktaş''ın baş məşqçi axtarışları davam edir.

“Football-plus.az” xəbər verir ki, Rza Çalımbayın istefaya göndərilməsindən bu yana artıq 12 gün ötüb. Amma hələ də yeni məşqçi tapılmayıb. Rəhbərlik bu müddətdə Kike Setyen, Ole-Qunnar Solskyaer və son olaraq Bruno Jenezio kimi məşqçilərlə danışıqlar aparsa da, onlarla anlaşmaq mümkün olmamışdı. Türkiyə mətbuatının yazdığına inansaq, İstanbul nəhəngi niderlandlı mütəxəssislə ilkin anlaşma əldə edib. Söhbət Covanni van Bronxorstdan gedir. Müqavilənin 1,5 illik olacağı, məşqçinin illik qazancının isə 1,3 milyon avroya bərabər olacağı gözlənilir. Amma bu təyinatın önündə bir maneə var. Belə ki, Van Bronxorst Jan-Pol van Qasteli öz köməkçisi təyin etmək və İstanbula onunla birlikdə gəlmək istəyir. Van Qastel də əslində buna razıdı. Amma məsələ burasındadı ki, bu məşqçi hazırda Niderlandın 2-ci divizion təmsilçisi ''Breda''nı çalışdırır. Qarşısına elitaya qayıtmaq hədəfi qoyan bu klub isə Van Qasteli buraxmaq istəmir. Van Bronxorst ilə Van Qastel daha öncə ''Feyenoord''da və Çin təmsilçisi ''Quançjou Siti''də birlikdə çalışıb. 48 yaşlı Van Bronxorst ən son ''Reyncers''də çalışmışdı və artıq 1 ildən çoxdu, işsizdi. O, 2021/22-də Qlazqo nəhəngini Avropa Liqasının finalına daşımış və ölkə kubokunu qazanmışdı.

ƏLİ