“Beşiktaş” heyətini 2 oyunçu ilə gücləndirib.

"Football-plus.az" xəbər verir ki, əslində bunlardan birinə yeni transfer demək düzgün deyil. Söhbət Tayfur Bingöldən gedir. 30 yaşlı yarımmüdafiəçi “Alanyaspor”a məxsus idi və ötən mövsüm icarə əsasında “ağ-qaralar”ın şərəfini qorumuşdu. Mövsüm bitəndən sonra Tayfur yenidən əvvəlki klubuna qayıtmışdı. Amma İstanbul nəhənginin performansından razı qaldığı bu futbolçunu daimi əsasda heyətinə qatacağı ilə bağlı xəbərlər səngimək bilmirdi. Bu şayiələr təsdiqini tapıb. Klubdan verilən rəsmi məlumatda Tayfurun transferi ilə bağlı “Alanyaspor”la razılıq əldə olunğu qeyd olunub. Rəsmi açıqlamada başqa detallara yer verilməsə də, Türkiyə mətbuatının yazdığına inansaq, bu transfer “Beşiktaş”a 1 milyon avroya başa gəlib. Tayfurla üçillik müqavilə imzalanıb. Daha öncə “Hacettepe”, “Gənclərbirliyi”, “Bandırmaspor”, “Adana Dəmirspor”, “Göztəpə” və “Bursaspor”da top qovan, 2020-də isə “Alanyaspor”a qoşulan Tayfur ötən mövsüm “Beşiktaş”ın heyətində 29 rəsmi oyuna çıxaraq 2 qol, 2 məhsuldar ötürməlik performans sərgiləmişdi.

“Beşiktaş”ın digər transferi isə “Mançester Yunayted”dəki çıxışı ilə tanınan Erik Bayidi. 29 yaşlı kot d`İvuarlı mərkəz müdafiəçisi srağagün İstanbula gəlib. Dünən isə tibbi müayinədən uğurla keçən təcrübəli futbolçu ilə “1+2” illik müqavilə imzalanıb. Onun illik qazancının 2,5 milyon avro civarında olacağı gözlənilir. Amma bu keçidin istanbullulara neçəyə başa gəlməsi ilə bağlı məlumat yoxdu. “Espanyol”un yetirməsi olan və peşəkar karyerasına bu klubda başlayan Bayi 2015-də 5,7 milyon avroya “Vilyarreal”a, 1 ildən sonra 38 milyon avroya “Yunayted”ə transfer olunub. Əslində onun İngiltərə macərası heç də pis başlamamışdı. İlk mövsümdə premyer-liqada 25 oyun keçirmişdi. Amma sonradan tez-tez zədələnməsi üzündən əsas heyətdəki yerini itirdi. Ötən mövsümü icarə əsasında “Marsel”də keçirən və 23 rəsmi oyuna çıxan Bayi “Yunayted” karyerasını 113 rəsmi oyun 1 qol, 1 məhsuldar ötürmə göstəriciləri ilə tamamlamış oldu. Kot d`İvuar yığmasında isə bu futbolçu indiyə qədər 49 oyun keçirib və 2 qol vurub.