''Beşiktaş'' ''Yunayted''in sabiq məşqçisinə təklif göndərdi
Şenol Günəş və Burak Yılmazın ardından bu günlərdə Rza Çalımbayla da yollarını ayıran ''Beşiktaş'' bu mövsümkü 4-cü məşqçi axtarışını davam etdirir.
"Football-plus.az" xəbər verir ki, mətbuatda əsasən əcnəbilər olmaqla bir çox namizədin adı hallanır. Yeni rəhbərlik artıq konkret addımlar atmağa başlayıb. Ötən həftə Kike Setyenlə danışıqlar aparılmış, amma anlaşma əldə olunmamışdı. Bu dəfə isə Ole-Qunnar Solskyaerə ciddi maraq göstərilir. 50 yaşlı norveçli mütəxəssisin meneceri danışıqlar üçün İstanbula dəvət edilib və ona ilyarımlıq müqavilə təklif olunub. Solskyaer Türkiyənin NTV kanalına açıqlamasında İstanbul nəhənginin ona maraq göstərməsini təsdiqləyərək bunları deyib:
''Beşiktaş''a diqqətçəkici təklif üçün təşəkkür edirəm. Hələ qərarımı verməmişəm. Mənə bir layihəmi təklif olunacaq, yoxsa, onlara sadəcə problemin qısamüddətli həlli lazımdı? Mən əsasən uzunmüddətli layihələrə üstünlük verirəm. Heyəti və təklif olunan imkanları dəyərləndirib qərarımı verəcəm''.
Qeyd edək ki, daha öncə ''Molde'' və ''Kardiff Siti''ni çalışdıran Solskyaer 2018-21-ci illərdə ''Mançester Yunayted''də işləyib. Onun İngiltərə nəhəngindəki dönəmi o qədər də uğurlu keçməmişdi. ''Yunayted'' bu məşqçi ilə keçirdiyi 149 rəsmi oyundan 78 qələbə, 33 heç-heçə, 38 məğlubiyyətlə ayrılaraq ümumilikdə 267 xal toplamışdı ki, bu da hər oyuna orta hesabla 1,79 xal deməkdi. Təcrübəli məşqçi 2021-in noyabrından, yəni ''Yunayted''dən qovulduqdan bu yana işsizdi.
ƏLİ
