''Beşiktaş'' bir futbolçu ilə yollarını ayırdığını açıqlayıb.

"Football-plus.az" xəbər verir ki, söhbət Erik Bayidən gedir.

29 yaşlı kot d'İvuarlı mərkəz müdafiəçisi mövsümün əvvəlində ''Mançester Yunayted''dən ayrılaraq azad agent statusunda ''Qartal'' ilə birillik müqavilə imzalamışdı. Amma onun Türkiyədə karyerası uğurlu alınmadı.

Hərçənd etiraf etmək lazımdı ki, ''Beşiktaş'' özü komanda şəklində çox ağır və qalmaqallı mövsüm keçirir. Bayi performansından çox tez-tez zədələnməsi ilə diqqət çəkdi. Qısa müddət ərzində o, 4 dəfə zədələndi və ümumilikdə yalnız 8 rəsmi oyuna çıxa bildi. Bu oyunlarda qol və ya məhsuldar ötürmə ilə fərqlənmədi. 3 həftə öncə ''Fənərbaxça''ya qarşı derbidən sonra ''Beşiktaş''ın yeni rəhbərliyinin qərarı ilə Bayi daha 4 futbolçu - Vensan Abubakar, Jan Onana, Rəşid Gezzal və Valentin Rozye ilə birlikdə əsas komandadan kənarlaşdırıldı. Yeni il ərəfəsində isə bu futbolçunun müqaviləsi qarşılıqlı şəkildə ləğv olundu. Bayi 87 gün ərzində çıxdığı cəmi 8 oyuna görə təxminən 2 milyon avroya yaxın məvacib qazandı. Bu futbolçunun artıq yeni klubu bəllidi. Bayi La Liqa təmsilçisi ''Vilyarreal'' ilə 1,5 illik müqavilə imzalayıb.

Heyətdən kənarlaşdırılan digər oyunçuların aqibətinə gəlincə, böyük ehtimalla kluba heç bir faydası olmayan Onana da satılacaq. Gezzal çoxsaylı zədələri üzündən gözdən düşüb. Onun da ayrılması gündəmdədi. Abubakar isə Səudiyyə Ərəbistanı klubları ilə danışıqlar aparır. Yalnız Rozyenin komandada qalmaq ehtimalı var.

ƏLİ