Bu gün millimiz AÇ-2024-ün seçmə mərhələsi çərçivəsində Brüsseldə Belçikayla üz-üzə gələcək.

Artıq matçın hakimləri bəllidi. Qarşılaşma Macarıstandan olan briqadaya tapşırılıb. FİFA referisi Gerqo Boqara Teodoros Georgiu və Balaş Şalai kömək göstərəcək. Dördüncü hakim funksiyasını Ferens Karako yerinə yetirəcək. UEFA-nın səbrsizliklə gözlənilən matç üçün şans verdiyi Gerqoyla tanış olmaq üçün saytımızın ənənəvi hakim təqdimatına keçid alaq.

Gerqo Boqar... 32 yaşlı ədalət təmsilçisinin karyerası o qədər də zəngin deyil. Əsasən Macarıstanın yüksək və aşağı liqa oyunlarında meydana çıxıb. Ölkəsində 151 matç idarə edən “fit sahibi” 722 sarı, 40 qırmızı vərəqə göstərib. O, cəmi 3 ildi ki, referi adını daşıyır. Hakim 2020-ci ildən bugünədək 31 beynəlxalq matçda ədaləti təmin edib. Bu siyahıya Çempionlar Liqası, Avropa Liqası və Konfrans Liqasının oyunları, həmçinin, 19 və 21 yaşadək futbolçuların Avropa çempionatının seçmə mərhələ görüşləri daxildi. Maraqlıdı ki, onun yolu indiyə qədər təmsilçilərimizlə kəsişməyib. Yəni, Boqara ilk dəfə komandamızın matçına təyinat alıb. Ümid edək ki, siftə həm onun, həm də bizim üçün düşərli olacaq.

Ümumiyyətlə, Gerqo karyerası ərzində 204 oyun idarə edib. Referi bu görüşlərdə 935 sarı, 56 qırmızı vərəqə göstərib.

KƏNAN BAHADIR