Əsas millimiz bu gün AÇ-2024-ün seçmə mərhələsində Estoniya ilə qarşılaşacaq.

Artıq UEFA yığmamızın sözügedən səfər oyunu üçün hakim təyinatlarını açıqlayıb. Tallində keçiriləcək qarşılaşmada ədaləti təmin etmək Almaniyadan olan hakimlər briqadasına tapşırılıb. Matçı Robert Şröder idarə edəcək. Ona Kristian Gittelmann və Robert Vessel yardım göstərəcək. Maraqlıdı ki, dördüncü hakim funksiyası əvvəlcə Florian Badstübnerə tapşırılmışdı. Lakin sonradan baş verən dəyişikliyə görə, bu vəzifəni Danimarkadan Sandi Putros yerinə yetirəcək.

İndi isə "Football-plus.az"ın ənənəvi hakim təqdimatına keçid alaq.

Robert Şröder… 38 yaşlı FİFA referisi karyerasına 2001-ci ildə başlayıb. İlkin fəaliyyəti Almaniya bundesliqasının və aşağı liqaların matçını idarə etməkdən ibarət olub. Ədalət təmsilçisi ölkəsində üzdə olan hakimlərdən deyil. Onu ara-sıra rəsmi matçlarda görmək mümkündü. Şröder bu mövsüm ölkəsində 6 dəfə meydana çıxıb. O, Dortmund "Borussiya”sının "Bohum"la heç-heçə etdiyi (1:1) və “Bavariya"nın 4 gün əvvəl "Frayburq"a 3:0 hesabı ilə qalib gəldiyi görüşü idarə edib. Almaniya çempionatlarında 176 matç idarə edib, bu oyunlarda 717 sarı, 38 qırmızı vərəqə göstərib.

Ədalət təmsilçisi 2015-ci ildən beynəlxalq oyunlara təyinat alır. Daha əvvəl U-21, U-19 və U-18 millilərinin yoldaşlıq matçlarını idarə edib. Bundan başqa, cari mövsümdə avrokuboklarda debüt edib. 2 oyunda meydanda olan referi yalnız postsovet məkanı ölkələrinin komandalarının oyununda iş başında olub. O, Konfrans Liqasında “Debretsen” (Macarıstan) – “Alaşkert” (Ermənistan) (4:3) və “Tvente” (Niderland) – “Riqa” (Latviya) (2:0) qarşılaşmalarında ədaləti qoruyub. Şröder birinci oyunda 8, ikincidə 5 sarı vərəqə göstərib. Həmçinin Ermənistan təmsilçisin futbolçusu Levon Kutalyanı meydandan qovub.

Şröder ilk dəfə əsas yığmaların seçmə görüşündə baş hakim olacaq. Ümid edirik ki, debütantın ayağı millimiz üçün düşərli olacaq. Ümumiyyətlə, referi karyerası boyunca 309 oyun idarə edib. O, bu görüşlərdə 1054 sarı, 61 qırmızı vərəqə üçün əlini cibinə atıb.

KƏNAN BAHADIR