Həftəsonu premyer-liqada qış fasiləsi ərəfəsində sonuncu tur keçirildi.

"Football-plus.az" xəbər verir ki, tur iddialılar üçün uğurlu alındı. Açılış oyununda “Ural”ı asanlıqla məğlub edən “Lokomotiv” evdə ardıcıl 3-cü qələbəsini qazandı. “Spartak” isə 12 dərəcə şaxtada keçirilən qarşılaşmada “Krılya Sovetov”u darmadağın edərək ilk dövrədəki fiaskonun qisasını aldı. Moskva nəhəngi ilk dövrədə Samarada 4 cavabsız top buraxmışdı. Maraqlıdı ki, bu, “Spartak”ın 2023-cü ildə premyer-liqada cəmi 2-ci böyükhesablı qələbəsi oldu. İlk belə qələbə avqustun əvvəllərində səfərdə “Rubin”lə oyunda (4:1) əldə olunmuşdu. “Ağ-qırmızılar” qış fasiləsinə 30 xal və 27 qolla yollandılar. Komanda ötən mövsüm 18-ci turdan sonra indikindən 7 xal artıq toplamış və 15 qol çox vurmuşdu! “Zenit” evdə “Nijni Novqorod”la görüşdə çox çətin, amma vacib qələbə qazandı. Kassyerra həm komandasına önəmli xallar qazandırmaqda, həm də bombardirlər yarışındakı liderliyini möhkəmləndirməkdə davam edir. Kolumbiyalı forvard premyer-liqada iştirak etdiyi ardıcıl 5-ci oyunda qol vurdu. Piterlilərin heyətində sonuncu dəfə belə seriya yaxalayan futbolçu 2021-də Dzyuba olmuşdu. Qroznıdan qolsuz bərabərliklə qayıdan Valeri Karpinin “Rostov”unun səfərdəki qələbəsiz seriyası 13 oyuna yüksəldisə, Voronejdən 1 xalla dönən “Dinamo”nun premyer-liqada məğlubiyyətsiz seriyası 9 oyuna çatdı. Ümumyyətlə, Moskva təmsilçisi ilk 18 turu cəmi 2 məğlubiyyətlə tamamlamaqla 1994 və 1996-cı illərdəki göstəricisini təkrarladı. “Rubin” sevimli 1:0 hesabı ilə “Baltika”dan üstün oldu. Kazanlıların bu mövsüm 8 qələbəsindən 6-da (!) məhz bu hesab qeydə alınıb.

Turun mərkəzi oyununda liderliyin taleyi həll olunurdu. ÇSKA “Krasnodar”ı büdrətsəydi, qış fasiləsinə “Zenit” lider qismində yollanacaqdı. “Hərbçilər” əllərindən gələni etsələr də, xal qazanmaq mümkün olmadı. 90-cı dəqiqədə künc zərbəsi zamanı Krivtsov topu saxlamadan yaxın küncü dəqiq nişan aldı. “Krasnodar” tarixində ilk dəfə qış fasiləsinə lider kimi yollandı. Bundan başqa, komanda 2023-cü ildə premyer-liqada keçirdiyi 16 ev matçının heç birində uduzmadı (12 qələbə, 4 heç-heçə). Sonuncu dəfə təqvim ilini evdə uduzmadan bitirən komanda 2019-da “Zenit” olmuşdu.

18-ci tur
Zenit – Nijni Novqorod 1:0
Kassyerra, 15.
Zenit: Adamov, Fernandes (Klaudinyo, 64), Çistyakov (Alip, 24), Rodriqao, Santos (Kruqovoy, 46), Vendel, Barrios, Du Keyroş, Mantuan (İzidor, 73), Mostovoy, Kassyerra (Sergeyev, 73).
Krasnodar – ÇSKA 1:0
Krivtsov, 90.
ÇSKA: Akinfeyev, Kellven, Lukin, Roşa, Moyzes, Qayiç, Zdelar, Mendes (Zabolotnı, 90+2), Oblyakov, Fayzullayev, Çalov (Davila, 90+2).
Spartak – Krılya Sovetov 3:0
Promes, 2. Sobolev, 8. Martins, 50.
Spartak: Maksimenko, Denisov, Duarte, Babiç, Xluseviç, Umyarov, Prutsev, Martins (Çernov, 85), Zinkovski, Promes (Meleşin, 90+3), Sobolev (Laykin, 90).
Lokomotiv – Ural 2:0
Morozov, 18. Tiknizyan, 90+2.
Lokomotiv: Lantratov, Nenaxov (Samoşnikov, 46), Morozov, Fasson, Silyanov, Barinov, Mitay (Jemaletdinov, 87), Mirançuk (Süleymanov, 73), Qluşenkov (Kulikov, 89), Tiknizyan, Dzyuba (Pinyaev, 73).
Fakel – Dinamo 1:1
Maksimov, 79-p. – Qladışev, 29.
Baltika – Rubin 0:1
Daku, 7.
Soçi – Orenburq 1:1
İqnatyev, 42 – Xotulev, 90+4.
Axmat – Rostov 0:0
1. Krasnodar 18 11 5 2 28-14 38
2. Zenit 18 11 3 4 35-17 36
3. Dinamo 18 8 8 2 29-22 32
4. Lokomotiv 18 8 7 3 29-23 31
5. Spartak 18 9 3 6 27-24 30
6. Krılya Sovetov 18 8 5 5 36-27 29
7. Rubin 18 8 4 6 17-21 28
8. ÇSKA 18 7 7 4 31-24 28
9. Nijni Novqorod 18 7 3 8 15-16 24
10. Rostov 18 5 6 7 24-29 21
11. Fakel 18 5 6 7 15-19 21
12. Ural 18 5 4 9 18-28 19
13. Axmat 18 4 5 9 18-23 17
14. Orenburq 18 3 6 9 19-28 15
15. Baltika 18 3 4 11 12-24 13
16. Soçi 18 3 2 13 17-31 11
Bombardirlər: Kassyerra (Zenit) – 14, Kordoba, Spertsyan (hər ikisi “Krasnodar”), Çalov (ÇSKA), Qarre (Krılya Sovetov), Tyukavin (Dinamo) – 8.
Növbəti turun oyunları gələn il martın 2-4-ü aralığında keçiriləcək: Zenit – Spartak, Rostov – Krılya Sovetov, Krasnodar – Rubin, ÇSKA – Orenburq, Dinamo – Lokomotiv, Axmat – Ural, Baltika – Soçi, Nijni Novqorod – Fakel.

Oyundan sonra
Sergey Semak, “Zenit”in baş məşqçisi: “Deməzdim ki, sonluq bizim üçün çətin keçdi. Çünki qapımız önündə, demək olar, qol vəziyyəti yaranmadı. Sadəcə, hesab “sürüşkən” olduğundan istər-istəməz ehtiyatlı oynayırdıq. Çünki bir səhv bizə baha başa gələ bilərdi. Oyunboyu topa yaxşı nəzarət etsək də, həlledici məqamda son zərbəni qoymaqda çətinlik çəkirdik. Mövsümün indiyə qədər olan dönəmindən razıyammı? Əlbəttə. Çempionluq mübarizəsini davam etdiririk. Kubokda da irəliləyirik. 18 turluq performansımıza “4” verərdim. Amma necə çətinliklərdən keçdiyimizi, hansı oyunçuları itirdiyimizi, zədəlilərimizin olduğunu da unutumayaq. Məsələn, yayda mənə qış fasiləsinə ikinci pillədə yollanmağı təklif etsəydilər, düşünmədən razılaşardım. Daha aşağı pillələrdə olacağımızı düşünürdüm. Futbolda daimi qalib yoxdu. Uzun illər zirvədə qalmaq asan deyil. Hətta “Bavariya” kimi klub son turda 5 top buraxdı. Bu məqam hər bir klubun müəyyən dönəmdə problemlərlə qarşılaşdığını göstərir”.

Vladimir İviç, “Krasnodar”ın baş məşqçisi: “Emosiyalarımız bir-birinə qarışıb. Son dəqiqədə gələn qol bizə həm qələbə, həm də böyük sevinc bəxş etdi. Demək olar, mövsümün əvvəlindən zirvədə qərarlaşmışıq və qış fasiləsinə də lider yollanırıq. Bu, gərgin əməyin nəticəsidi. Bu gün əsl xarakter nümayiş etdirdik. Son dəqiqədə vurduğumuz qol lider olmağa layiq olduğumuzu göstərdi. Sona 12 tur qalıb. Komandanın qarşısına ciddi hədəf qoyulub. Transfer dönəmində bəzi oyunçularımız ayrılsa, onların yerini mütləq doldurmalıyıq”.