“Spartak” mövsümün sonunu uğursuz keçirməkdə davam edir.

Bu dəfə Moskva nəhəngi çempionatın ən zəiflərindən olan “Ximki”ni yenə bilmədi. Komandanın son 11 rəsmi oyunda yalnız iki qələbəsi var. Adəti üzrə “Spartak” xal itkisindən sonra yenə hakimi günahlandırdı. Onların fikrincə, ilk hissənin sonlarında Denisova göstərilən 2-ci sarı vərəqə haqsız idi. Maraqlıdı ki, baş məşqçi Gilyermo Abaskalın oyunsonrası mətbuat konfransı cəmi 30 saniyə çəkdi və o, jurnalistlərin suallarına cavab verməkdən imtina etdi. Çempionluğu ötən tur rəsmiləşdirən “Zenit” “Krasnodar”la ev oyununda məğlubiyyətdən son anda qurtuldu. Bombardirlər yarışına başçılıq edən və növbəti qolunu vuran Malkom bu mövsüm premyer-liqada artıq 30 qolun vurulmasında yaxından iştirak edib (23 qol, 7 məhsuldar ötürmə). Sonuncu dəfə çempionatda ən azı 30 qolda iştirak etməyi bacaran futbolçu 2015/16-da yenə də “Zenit”in heyətində Halk olub (17 qol, 16 məhsuldar ötürmə).

Şənbə gününün son matçında elitanı tərk edən ilk klubun adına aydınlıq gəldi. 9-cu turdan bu yana sonuncu pillədən “möhkəm yapışan” “Torpedo” əla formada olan ÇSKA önündə darmadağı olaraq taleyi ilə barışdı. Son 10 turda 30 mümkün xaldan 28-ni qazanan və 2-ci pillədə qərarlaşan “hərbçilər” sona 3 tur qalmış “Spartak”la fərqi 4 xala çatdırdılar. Növbəti turda məhz elə bu klubların derbisi baş tutacaq.

Bazar gününün ilk matçında “Krılya Sovetov”la “Lokomotiv” qalibi müəyyənləşdirə bilmədi. Samaralılar çempionat çərçivəsində “Loko”nu ardıcıl 17-ci oyunda məğlub edə bilmədilər. Seriya 2011-in aprelindən başlayıb. “Axmat”ın səfərdə “Dinamo”nu asanlıqla darmadağın etməsi bir qədər gözlənilməz oldu. Qroznılıların səfər göstəriciləri diqqəti çəkir. Komanda bu mövsüm rəqib meydanlarında həm qələbə (8) sayına, həm də toplanılan xallara (26) görə şəxsi rekordunu yeniləyib. Matçdan bir neçə saat sonra Slavişa Yokanoviçin istefa xəbəri gəldi. Çünki “Dinamo” enişdə idi və son 4 turun üçündə uduzmuşdu. Serbiyalı mütəxəssis moskvalıların “sükanı arxasına” ötən yay keçmişdi. Komanda onun başçılığı altında kubokda yarımfinala qədər irəlilədi. Yokanoviçi həmyerlisi, “Lokomotiv”in sabiq çalışdırıcısı Marko Nikoliçin əvəzləyəcəyi gözlənilir.

“Fakel” “Nijni Novq orod”u yenməklə ardıcıl 3-cü “quru” qələbəsini qazandı. Elitada cəmi 5-ci mövsümünü keçirən voronejlilərin daha öncə heç vaxt belə seriyası olmamışdı. 3-cü pillədəki “Rostov” isə yenə qola və xala həsrət qaldı. Enişdə olan Valeri Karpinin komandasının son 6 turda cəmi bir qələbəsi var.

27-ci tur
Zenit – Krasnodar 2:2
Malkom, 15. Kassyerra, 90+6 – Banyats, 51. İonov, 58.
Zenit: Kerjakov, Karavayev (Yeroxin, 85), Çistyakov (Kruqovoy, 74), Alip, Santos, Barrios, Klaudinyo, Vendel (Kuzyayev, 62), Malkom, Mostovoy (Mantuan, 74), Sergeyev (Kassyerra, 61).

ÇSKA – Torpedo 3:0
Çalov, 5; 90-p. Oblyakov, 38.
ÇSKA: Akinfeyev, Qayiç, Roşa (Nababkin, 90+4), Diveyev, Moyzes (Aqapov, 90+4), Medina, Zdelar, Mendes, Oblyakov, Çalov (Kuçayev, 90+3), Zabolotnı (Karraskal, 85).

Ximki – Spartak 1:1
Mirzov, 23 – Sobolev, 56.
Spartak: Selixov, Denisov, Çernov (Maslov, 89), Litvinov, Tavareş, Martins, Prutsev (Mozes, 60), Zinkovski (İqnatov, 80), Balde (Xluseviç, 60), Promes, Sobolev (Nikolson, 89).

Krılya Sovetov – Lokomotiv 1:1
Tsıpçenko, 40 – İzidor, 48.
Lokomotiv: Lantratov, Nenaxov, Kuzmiçev, Poqostnov, Tiknizyan, Barinov, Karpukas (Maradişvili, 69), Kamano (Mitay, 84), Mirançuk (Qluşenkov, 46), Jemaletdinov (Rakov, 65), İqnatyev (İzidor, 46).

Soçi – Rostov 1:0
Şipunov, 89.

Dinamo – Axmat 0:3
Qbamble, 38. Konate, 57. İlyin, 71.

Ural – Orenburq 2:1
Yuşin, 62. Kaplenko, 89-öz qapısına – Obuxov, 83.
Fakel – Nijni Novqorod 1:0
Akbaşev, 67-p.

1. Zenit 27 20 5 2 70-17 65
2. ÇSKA 27 16 6 5 51-24 54
3. Rostov 27 14 8 5 44-35 50
4. Spartak 27 14 8 5 58-36 50
5. Axmat 27 14 4 9 44-34 46
6. Krasnodar 27 12 7 8 57-44 43
7. Dinamo 27 12 6 9 44-38 42
8. Orenburq 27 12 3 12 50-52 39
9. Soçi 27 11 4 12 36-48 37
10. Lokomotiv 27 10 6 11 46-43 36
11. Ural 27 8 6 13 29-42 30
12. Fakel 27 5 12 10 34-45 27
13. Krılya Sovetov 27 6 8 13 27-43 26
14. Nijni Novqorod 27 6 5 16 27-50 23
15. Ximki 27 4 6 17 25-59 18
16. Torpedo 27 3 4 20 20-52 13

Bombardirlər: Malkom (Zenit) – 23, Promes (Spartak) – 18, Çalov (ÇSKA) – 17.
Növbəti turun oyunları mayın 20-22-si aralığında keçiriləcək: Lokomotiv – Fakel, Torpedo – Dinamo, Orenburq – Zenit, Axmat – Ximki, Krılya Sovetov – Ural, Spartak – ÇSKA, Krasnodar – Rostov, Nijni Novqorod – Soçi.