Həmvətənimiz Mahir Emrelinin Zaqreb “Dinamo”sunda işləri heç də yaxşı getmir. Baş məşqçi Sergey Yakiroviç onu son bir ayda çempionat oyunlarında yaşıl meydana həsrət qoyub.

Hücumçu sonuncu dəfə 14-cü turda “Varazdin”lə matçda çıxış edib. Daha dəqiq desək, noyabrın 5-də keçirilən oyunun 75-ci dəqiqəsində meydana çıxıb və 90+4-də qol vuraraq komandasını məğlubiyyətdən xilas edib. Ondan sonra yaşıl meydana həsrətdi. Tezliklə qış “transfer pəncərəsi” açılacaq, deməli, iş yerini dəyişmək üçün münasib vaxtdı.

Bəs Mahir bu imkandan yararlanacaqmı? Bu sualla onun sabiq meneceri Tural Əsgərova müraciət etdik.

- Mahir Emreli “Dinamo”da oynayacaq səviyyədə futbolçu deyil kimi mesajlar eşidirik. Demək olar ki, ona şans verilmir. Sizcə, problem nədədi? Mahir özünü göstərə bilmir, yoxsa baş məşqçi ona münasibətdə qərəzlidi?
- Doğrusu, mən pafoslu sözlər işlətməyin tərəfdarı deyiləm. Hansısa futbolçunun hansı səviyyədə olmadığını və ya olduğunu demək, eləcə də Mahirin Zaqrebin “Dinamo”sunda oynayacaq səviyyədə olmadığını iddia etmək düzgün deyil. Fakt budu ki, Mahir “Dinamo”da heyətə düşməkdə çətinlik çəkir. Artıq bir neçə məşqçi dəyişdiyinə görə hesab edirəm ki, bundan sonra Mahirin o klubda ciddi şansı yoxdu, orda əsas heyət üzvünə çevrilə bilməyəcək. Təəssüf ki, səbəblərini deyə bilmirəm. Çünki kənardayam. Klubda nə baş verdiyini bilmirəm. Amma niyə belə əminliklə deyə bilirəm ki, Mahir orda əsas heyət üzvü olmayacaq? Çünki bir neçə məşqçi dəyişib. Bir də mənim şəxsi düşüncəmə görə, bu “Dinamo” bəlkə də son 10 ilin ən zəif “Dinamo”sudu. Bu o deməkdi ki, klub uzun müddət belə zəif qalmayacaq. Bu mövsüm avrokubokdakı uğursuz çıxışdan sonra komanda xeyli güclənəcək. Artıq güclənəndən sonra bu gün heyətə düşməkdə çətinlik çəkən Mahirin orda oynamaq şansı sıfra bərabər olacaq. Klub rəhbərliyi ilə arasında münasibət pozulubsa da, mənim bundan xəbərim yoxdu. Ümumiyyətlə, “Dinamo” rəhbərliyində olanlar elə adamlardı ki, onlar üçün klub biznesdi. Mahir üçün müəyyən məbləğdə pul ödənilib. Əlavə də oyunçunun maaşı, bonusları ödənilib. “Dinamo” üçün bu pulu geri qaytarmamaq, yəni Mahiri daha yaxşı şərtlərlə satmamaq ciddi uğursuzluqdu. Baş məşqçinin onu qərəzli şəkildə meydanda görmək istəməməsi barədə danışmaq da doğru deyil. Bu bir biznes-layihədi - uğurlu və ya uğursuz olacaq. Hər kəs də istəyər ki, gördüyü iş uğurlu olsun.

- Futbolçunun daim ehtiyatda qalması, oyun vaxtı qazanmaması millidəki oyununa da təsir etməyəcəkmi?
- Əlbəttə, təsir edəcək, bu bəlli məsələdi. Bir var ki, klubda müntəzəm oynayan bir futbolçu milliyə gəlsin, bir də var ehtiyatda oturan, özünəinamı itən futbolçu gəlsin. Burda ciddi fərq var.

- “Dinamo”da rəhbərlik, baş məşqçi ilə ulduzu barışmayacağı təqdirdə qışda klubla yollarını ayırmalı olsa, Mahirin hansı qərar verəcəyini düşünürsüz? Yenidən vətənə qayıda bilərmi?
- Belə görünür ki, “Dinamo”nun Mahirlə bağlı ümidləri böyük deyil. Sözləşməsi də sona yaxınlaşmaq üzrədi. Bundan sonra ilyarım müqaviləsi qalıb. “Dinamo” kimi futbolçuya pul gözü ilə baxan klublar üçün hansısa oyunçuya pul xərcləyib sonra onu yaxşı qiymətə sata bilməmək fiaskodu. O baxımdan böyük çətinlikdi ki, klub rəhbərliyi müqaviləni pozsun. Çünki zaqreblilər ona görə ödənilən pulları fikirləşir. “Dinamo” belə qərar verərsə, Mahiri sərbəst buraxarsa, mən onun yerində olsam, qəbul edərəm. Demək olar ki, Mahirin Zaqreb “Dinamo”sunda oynamaq şansı yoxdu. Belə olacaqsa, Mahirin son dönəmdəki çıxışına əsasən deyə bilərik ki, onun Avropada qalmaq şansı çox cüzidi. Hətta mən deyərdim ki, belə çıxışdan sonra Avropadakı heç bir ciddi kluba keçə bilməyəcək. Bu baxımdan onun Azərbaycana qayıtması mümkün görünür. Bir də Türkiyə variantın unutmaq olmaz. Çünki azərbaycanlı futbolçular orda əcnəbi sayılmadığına görə bu da baş verə bilər. Yəqin ki, buna futbolçu özü qərar verəcək.

- Pis variant reallaşarsa, Mahir vətənə qayıdarsa, hansı kluba keçə bilər? Vaxtilə “Qarabağ” ın heyətində çıxış etməsi məhz ora dönüşü üçün təkan ola bilər?
- Müxtəlif klublar ola bilər. Futbolçu üçün düzgün transfer seçimi etmək çox vacibdi. Mən Mahirlə işləyəndə onun “Legiya”ya keçidinin əleyhinəydim. Bunu yanlış addım sayırdım. Sonra onunla işləməsəm belə, “Dinamo”ya keçidinə müsbət yanaşmamışam. Düşünürəm ki, sadəcə, klubun adına görə qərar vermək düzgün deyil. Növbəti bir seçim olacaqsa, çalışmaq lazımdı ki, doğru seçim olsun. Artıq bu işlə də Mahir özü və agentləri məşğul olmalıdı.

MİRKAMAL KAZIMZADƏ