Azərbaycan futbolunu başqa ölkələrdə təmsil edən adlı-sanlı futbolçulardan biri də Mahir Emrelidi.

Bildiyiniz kimi, o, hazırda Zaqreb “Dinamo”sunun şərəfini qoruyur. Amma Xorvatiya çempionatında meydana çıxırmı? Yox, çıxmır! Komandanın baş məşqçisi Sergey Yakiroviç onu son bir ayda çempionat oyunlarında yaşıl meydana həsrət qoyub.

“Football-plus.az” xəbər verir ki, hücumçu sonuncu dəfə 14-cü turda “Varazdin”lə matçda çıxış edib. Daha dəqiq desək, noyabrın 5-də keçirilən oyunun 75-ci dəqiqəsində meydana çıxıb və 90+4-də qol vuraraq komandasını məğlubiyyətdən xilas edib. Bundan sonra futbolçunu "gördüm" deyən yoxdu.

Bu azmış kimi, onun növbəti matçı buraxması da gündəmdədi. Bu haqda Xorvatiya mətbuatı məlumat yayıb. “İndex.hr”nin iddiasına görə, dekabrın 17-də keçiriləcək “Dinamo” – “Hayduk” derbisində iştirakı sualı altında olan futbolçular arasında Mahir Emreli də var: “Nəzərə alsaq ki, komandalar bu oyuna qədər hərəyə bir oyun keçirməli olacaq, onlar növbəti sarı vərəqəsi üçüncü olacaq oyunçulara xüsusi diqqət yetirməlidi. Buna görə derbini buraxa bilərlər. Həm “Dinamo”nun, həm də “Hayduk”un bu problemi olan beş futbolçusu var. Zaqreb təmsilçisindən Dino Periç, Qabriel Vidoviç, Kevin Teofil-Ketrin, Yosip Mişiç və Mahir Emreli, “Hayduk”da isə Zvonimir Şarliya, Emir Saiti, Niko Siqur, İvan Dolçek və Antoni Kalikin adları bu siyahıdadı”.

Maraq üçün qeyd edək ki, Mahir geridə qalan 17 turda 4 dəfə start heyətinə daxil edilib. Ümumiyyətlə, 15 matçda iştirak ərizəsində adı olan oyunçu 11 görüşdə sonradan meydana çıxıb. Hesabında 4 qol, 3 məhsuldar ötürmə var. Maraqlısı odu ki, Mahirin performans cəhətdən problemi yoxdu. Bəs Sergey Yakiroviç futbolçumuzla niyə belə davranır? Sanki əlindən gələni edir ki, Mahir qışda klubunu dəyişsin...

KƏNAN BAHADIR