Misli premyer-liqasında yeni mövsümə uğurlu başlayan komandalardan biri də “Səbail”di.

Bayıl təmsilçisi 13 tur sonra 21 xalla turnir cədvəlinin 4-cü sırasında qərarlaşıb. Mövcud duruma əsasən, Şahin Diniyevin yeni formalaşdırdığı kollektivdə qüsur tapmaq çətindi. Ciddi çatışmazlığın olduğunu iddia edə bilmərik. Çoxu komandanın hansısa aparıcı futbolçusunu itirmədikcə büdrəməyəcəyini deyirdi ki, bədbəxt hadisə yaşandı. Kapitan Ağabala Ramazanov 12-ci turda “Turan Tovuz”la ev matçında (2:1) zədələndi. Daha dəqiq desək, hücumçu rəqibin müdafiəçisi Faiq Hacıyevlə mübarizədən sonra yerə yıxıldı. Başverənlərdən dərhal sonra xəstəxanaya çatdırılan oyunçu haqda gündəmdə olan iddialar var. Bunlardan biri də onun 2023-cü ildə bir daha meydana çıxmayacağıdı. Görəsən, həqiqətən belədi? Ümumiyyətlə, Ağabalanın vəziyyəti necədi?

Kapitanın son durumuyla bağlı doğru bilgi almaq üçün baş məşqçi Şahin Diniyevlə danışdıq: “Futbolçu xəstəxanadan çıxarılıb. Hazırda Bakıda yerləşən sanatoriyalardan birində müalicə alır. Ciddi həkim nəzarəti altındadı. Bir müddət keçəndən sonra meydanlara nə vaxt dönəcəyi haqda dəqiq danışmaq olur. Bilindiyi kimi, Ağabalaya kəllə-beyin zədəsi diaqnozu qoyulmuşdu. Şükür Allaha, huşu və nitqi yerindədi, özünü yaxşı hiss edir. Hazırda sağlamlığının bərpa edilməsi daha vacibdi. Nə biz, nə də onu istəyən yaxınları futbolçu karyerası haqda düşünür. İstəyimiz tezliklə müalicəsinin sona çatması və əvvəlki səhhətinə qovuşmasıdı”.

“Dənizçilər”lə bağlı gündəmi zəbt edən ikinci mövzu Samir Abdullayevin U-21 millimizin baş məşqçisi Samir Əliyevə qarşı hörmətsizlik etməsidi. Xatırladaq ki, mütəxəssis AÇ-2025-in seçmə mərhələsində Ukraynaya qarşı matçın (0:1) 63-cü dəqiqəsində yarımmüdafiəçini Murad Vəliyevlə əvəzlədi. Meydandan çıxan vinger əvvəlcə qoluna bağladığı sarğını açaraq yerə çırpdı və baş məşqçinin əlini sıxmadı. Hətta ona təsəlli vermək istəyən çalışdırıcını itələdi. Şahin Diniyevin bu haqda düşüncələrini də öyrəndik: “Samirin hərəkətini qınayıram. Qəbuledilməzdi. Onunla razıyam ki, futbol emosiya oyunudu. Bəzi məqamlarda səbrsiz davranışlar sərgiləmək qaçılmaz olur. Buna baxmayaraq, daha diqqətli olmaq lazımdı. Əslində hansısa aqressivliyiylə seçilən, emosiyalarını cilovlamağı bacarmayan biri bunu etsə, başadüşülən olardı. Lakin Samiri belə tanımamışam. Ondan heç gözləmirdim ki, baş məşqçisinə hörmətsizlik etsin. Üstəlik Samir Əliyev ölkəmizin təcrübəli, savadlı, sözünü demiş mütəxəssislərindi. Belə hərəkətlərə layiq deyil. Futbolçu klubumuz tərəfindən cəzalandırılacaq”.

Bayıl təmsilçisiylə bağlı sonuncu məsələ isə ev oyunlarının keçirildiyi stadiondu. “Səbail”in bu gün “Kəpəz”lə qarşılaşacağını bilirsiz. PFL bir neçə gün öncə matçın əvvəlcədən deyildiyi kimi saat 18.30-da yox, 14.00-da keçiriləcəyini bildirdi. Yerli mətbuatın tirajladığı xəbərə görə, buna AFFA ilə klub arasında yaranan narazılıq səbəb olub. İddialara inansaq, “ASCO Arena”nın işıqlandırma sisteminin bir hissəsi sıradan çıxıb. Bu, ilk dəfə özünü ötən həftə göstərib. Burda keçirilən turnirin gedişində işıqlar qəfil sönüb və azyaşlılardan ibarət komandalar soyuq havada 30 dəqiqə gözləməli olub. AFFA isə balansındakı stadionun problemini aradan qaldırmaqdan imtina edib. Deyilənə görə, bunun üçün təxminən 50 min manat lazımdı. Federasiya xərcin klub tərəfindən qarşılanmasını istəyib. ”Səbail” mənsubları isə əsas sponsoru - Xəzər Dəniz Gəmiçiliyinin rəhbərliyi ilə məsləhətləşmədən sonra təmirə vəsait ayırmağı öz üzərinə götürməyib. Nəticədə klub AFFA-ya büdcədə məbləğin az olduğunu bildirib. Odu ki, problemin həlli zamanın öhdəsinə qalıb. Xəbərdə tərəflərdən birinin məsuliyyəti öz üzərinə götürmədiyi təqdirdə 2024-cü ilin aprelinədək stadionda axşam saatlarında oyun keçirilməyəcəyi bildirilir. Bu iddiaların səhihliyini öyrənmək məqsədilə “Səbail”in mətbuat xidmətinin rəhbəri Rəşad Məmmədovla danışdıq: “Son üç gün içində baş verən hadisədi. "ASK Arena"nı işıqlandıran transformatorda nasazlıq yaranıb. Bunu bir-iki günə həll etmək olmaz. Qarşıdakı bir neçə həftə ərzində bu problem həllini tapacaq. Klubla AFFA arasında heç bir problem yoxdu. Texniki nasazlığın aradan qaldırılması istiqamətində federasiya tərəfindən müvafiq addımlar atılır. Ümumiyyətlə, qurum təmir prosesi və hər hansı mailiyyə mövzusuyla bağlı bizə müraciət etməyib. Klubumuz AFFA-dan xəbər verildiyi halda istənilən köməyi göstərməyə hazırdı”.

KƏNAN BAHADIR