Azərbaycan futbolunda ən həyəcanlı mərhələyə qədəm qoyulub. Artıq ölkə kubokunun finalçıları bəllidi.

Misli premyer-liqasında çempionun məlum olmasına isə 5 tur qalıb. Klubların durumuna nəzər saldıqda ən narahatının “Səbail” olduğunu görürük. Kubokun yarımfinalının cavab matçında “Qəbələ”yə uduzaraq mübarizəni dayandıran bakılılar premyer-liqada da sonuncu pillədə qərarlaşıb. Yox, qərarlaşmayıb, sanki komandanı 10-cu yerə pərçimləyiblər. Bu gedişlə “dənizçilər”in gəmisi 1-ci divizionun sularında üzməli olacaq. “Səbail”in cari mövsümdə eniş-yoxuşlu macəraları çox maraqlıdı. Komanda çempionat oyunlarında uduzduğu bir çox rəqibi ölkə kubokunda mübarizədən kənarlaşdırmaqla təzad yaradıb.

Mahmud Qurbanovun “gəmi”si batsa da...

Bayıl təmsilçisi mövsümün ilk yarısında Mahmud Qurbanovun rəhbərliyi altında meydana çıxdı. Premyer-liqada ilk 18 turda 10 xal toplayan komanda 2 qələbə, 4 heç-heçə və 12 məğlubiyyətlə yadda qaldı. Rəqib qapısına 13 dəfə yol tapan “Səbail” 33 qola üzüldü.

Ölkə kubokunda isə mənzərə fərqli oldu. Qurbanovun komandası 1/8 finalda MOİK-i, 1/4 finalda “Sabah”ı mübarizədən kənarlaşdıraraq yarımfinala vəsiqə qazandı. Bu mənzərəni gəminin batmasından sonra qalan xəzinəyə bənzətmək olar.

Şahin Diniyevin “gəmi”sinə su sızır

Mahmud Qurbanovun istefasından sonra “dənizçilər”in “sükanı arxasına” Şahin Diniyev gətirildi. Daha əvvəl "Qarabağ", "Kəpəz", "Rəvan" və milli komandanın baş məşqçisi olan mütəxəssislə 2023/24 mövsümünün sonuna qədər müqavilə bağlandı. Onun qarşısında iki məqsəd var idi: komandanı turnir cədvəlinin “zirzəmi”sindən xilas etmək və ölkə kubokunun yarımfinalında “Qəbələ” ilə qarşılaşmadan üzüağ ayrılmaq. Amma görünən budu ki... “Səbail” premyer-liqada Şahin Diniyevin rəhbərliyi altında 13 dəfə meydana çıxıb. 7 matçda uduzan komanda 3 qələbə qazanıb, 3 dəfə isə 1 xalla kifayətlənib. Rəqib qapısından 11 top keçirən bakılılar 19 dəfə bunun qarşısını ala bilməyib.

“Dənizçilər”in çempionatın son 5 matçında turnir cədvəlində özündən öndə olan “Qəbələ”, “Sumqayıt”, “Qarabağ”, “Turan Tovuz” və “Şamaxı” ilə qarşılaşacağını nəzərə alsaq, vəziyyətin ürəkaçan olmadığı bəllidi. Bayıl təmsilçisinin ölkə kubokunda da bəxti gətirmədi. Bakıda keçirilən yarımfinalın cavab oyununda “Qəbələ”yə 1 cavabsız qolla məğlub olaraq kubokla vidalaşdı.

Günahkar kimdi?

Şahin Diniyev Misli premyer-liqasının 31-ci turunda doğma meydanda "Neftçi" ilə heç-heçə (1:1) etdikləri matçdan sonra jurnalistlərin "Səbail"i daha çox Mahmud Qurbanov daşıyır, yoxsa siz?” sualına belə cavab vermişdi:

Hadisələrin axarı yaxşı nəsə göstərmir. “Səbail” hələ də sonuncu yerdədi. Mütəxəssis “dənizçilər”i burulğandan xilas edə bilməyib. Ciddi irəliləyişin baş verdiyini demək olmaz. Şahin bəy nadir hallarda futbolçularını tənqid edir və ya günahı onlarda görür.

Bununla yanaşı, o, mövsümün sonunda heç bir komandanın premyer-liqadan kənarlaşdırılmasını istəmir. Diniyevin idman prinsiplərinə uyğun olmayan arzusunu dəstəkləyənlər də elə turnir cədvəlinin aşağısında qərarlaşan klublardı.

Hələ ki “gəmi”də əhval-ruhiyyə tam pozulmayıb. “Dənizçilər”in limana sağ-salamat çatıb-çatmayacağını isə zaman göstərəcək.

KƏNAN BAHADIR