Misli premyer-liqasının 12-ci turunda “Turan Tovuz”u məğlub edən “Səbail” (2:1) oyunun gedişində üç futbolçusunu itirdi.

Süleyman Əhmədov 9-cu dəqiqədə zədələnərək meydanı tərk etdi. Kapitan Ağabala Ramazanov çox sərt zədə alaraq matçı davam etdirə bilmədi. Qələbə qolunun müəllifi Aleksandr Ramalinqom də axsadığından 90 dəqiqə meydanda qala bilmədi. Görəsən, oyunçuların indiki durumu necədi? Ağabalanın vəziyyəti sabitdi. Futbolçu xəstəxanada, həkim nəzarəti altındadı. Onun huşu özündədi, danışa bilir. Sadəcə, sonradan problem çıxmasın deyə həkim nəzarəti davam edir.

Süleyman Əhmədovun çiyini yerinə salınıb və iki-üç gün sonra məşqlərə başlayacaq. "Səbail" cari mövsümdə bombardiri olan Ramalinqomun zədəsinə də aydınlıq gəlib. MRT müayinəsi fransalı hücumçunun 2-3 həftəliyə sıradan çıxdığını göstərib. Arxa əzələsini dartan Ramalinqom yalnız bir oyunu - "Qarabağ"la qarşıdakı turda səfər matçını buraxacaq. Çünki bundan sonra çempionatda milli komandaların oyunlarıyla bağlı ikihəftəlik fasilə yaranacaq və forvard həmin müddətdə tam sağalaraq 14-cü turda - "Kəpəz"lə görüşə sıraya dönəcək.

İLKİN SULTANLI