“Şamaxı” premyer-liqanı tərk edəndən sonra oyununu stadiondan canlı izləməmişdim.

Düzdü, 1-ci liqadakı komanda ilə ötən mövsümdəki arasında çox fərq var. Yenə də Vüqar Əsgərlinin rəhbərlik etdiyi kollektivi izləmək üçün Şamaxıya yollandım.

“Şirlər” 1-ci liqada çıxış etsə də, oyuna maraq yetərincə böyük idi. Həm yerli, həm də qonaq komandanın azarkeşləri stadiona səfər etmişdi. Oyunu izləyənlər arasında Vəli Qasımov və Ramiz Məmmədov kimi məşhur simalar da var idi.

Görüş qonaqların sürətli hücumları ilə başladı. Kənan Kərimovun rəhbərlik etdiyi komanda 11-ci dəqiqədə hesabı açdı. Künc zərbəsindən ötürülən topu Ruslan Süleymanov tamamladı. Bu qol meydan sahiblərini şoka saldı. Düzdü, “şirlər” topa nəzarət edən tərəf idi. Lakin “Karvan”ın hücumları daha kəsərli alınırdı. 24-cü dəqiqədə qonaqlar ikinci qolu vurdu. Kinqsin fəallığı sayəsində “Karvan” penalti vurmaq şansı əldə etdi. Afrikalı Süleyman Damadayevi keçmək istəyən zaman müdafiəçi əllə topa müdaxilə etdi. 11 metrlik cərimə zərbəsini dəqiq yerinə yetirən Əli Abdullayev hesabı 2:0 etdi.
Qoldan sonra “Şamaxı” toparlanmağa başladı. Vüqar Əsgərlinin komandası hücuma atılaraq fərqiazaltmağa cəhd edirdi. Şamaxılılar istəyinə ilk hissəyə əlavə olunmuş dəqiqələrdə çatdı. Cərimə meydanı daxilində Qurban Səfərova qarşı edilən kobudluğu Nicat İsmayıllı penalti kimi dəyərləndirdi. Zərbəni dəqiq yerinə yetirən Emin Zamanov hesab arasında fərqi azaltdı.

Fasilədən sonra meydan sahibləri daha istəkli oyun sərgiləməyə başladı. Onlar 2-ci hissəyə fırtına kimi başladı. 47-ci dəqiqədə 1-ci liqanın bombardiri Elşad Tağıyev hesabı bərabərləşdirdi. Azarkeşlər artıq komandalarının geridönüş etdiyini düşünməyə başlamışdı. Çünki Vüqar Əsgərlinin rəhbərlik etdiyi kollektiv rəqibi təzyiq altında saxlayırdı. Lakin qonaqlar etibarlı müdafiə olunmaqla əks-hücumlara bel bağlayırdı. Kənan Kərimovun taktikası işə yaradı. Matçın 72-ci dəqiqəsində Əkpər Vəliyev Ruslan Voronsova qarşı kobud oynadı. Yenə Nicat İsmayıllı “nöqtə”ni göstərdi. Əli Abdullayev bu penaltini də dəqiq yerinə yetirməklə komandasını önə keçirdi. Məğlubiyyətlə barışmaq istəməyən “şirlər” önə atıldılar. Lakin yenə bu cəhdlər işə yaramadı. “Karvan” isə “Şamaxı”nın qapısına yaxınlaşanda qol vururdu. 84-cü dəqiqədə Ruslan Voronsov gözəl reyd edərək hesabı 4:2 etdi. Bununla da qarşılaşmada başqa qol vurulmadı. Soyuq hava şəraitində keçən, 3 penaltinin verildiyi, 6 qolun vurulduğu qarşılaşmada “Karvan” qələbə qazandı.

İLKİN SULTANLI