Srağagün keçirilən iki oyunla 1-ci liqada 5-ci tura yekun vuruldu.

"Football-plus.az" xəbər verir ki, turun ilk matçında “Zaqatala” “Araz Saatlı”nı qəbul etdi. Ev sahibləri meydana ilk qələbə üçün çıxmışdı. Qonaqlar bu arzuya ötən həftə çatsa da, uğurlu gedişi davam etdirmək istəyirdi. Nəticə zaqatalılar üçün sərfəli oldu. Rüstəm Məmmədovun komandası mövsümdə ilk qələbəni 2 cavabsız qolla qazandı. Rəqibin yeni baş məşqçisi Rüfət Quliyevin səfər debütü isə ürəkaçan olmadı.

İkinci oyun “Difai Ağsu” ilə “İmişli” arasında keçirildi. Ötən tur “havayı” 3 xal qazanan qonaqlar bu dəfə ağsuluları eyni hesabla (3:0) uddu. Əsgər Abdullayevin yetirmələri yola qənaətbəxş davam edir. Beləliklə, Ağsu təmsilçinin durumu daha da pisləşdi. 6 qarşılaşmada 5 məğlubiyyət yaşayan komandada ciddi islahatlar labüdləşib. Klub mövsümə autsayder kimi davam etmək istəmirsə, buna məcburdu.

Üçüncü oyun Yevlaxda oldu. “Karvan”ın evdə “Qaradağ Lökbatan”ı sınağa çəkdiyi qarşılaşmada gərgin anlar yaşandı. Baş hakim Əli Əliyev xeyli futbolçunu cəzalandırmaqla yanaşı, Kənan Kərimovun kollektivinə 2 “qırmızı” göstərdi. Matç 77-ci dəqiqədən azlıqda qalan komandanın 1:2 hesablı məğlubiyyətiylə sona çatdı. Beləliklə, “Karvan” xal itirdisə, lökbatanlılar iddiasını qorudu.

Dördüncü görüşü futbol ictimaiyyəti maraqla gözləyirdi. Ötən tur meydana çıxmadığına görə cəzalandırılan “İrəvan”da eyni hal yaşansa, turnirdə çıxışına xitam veriləcəkdi. Maraqlıdı ki, Qərbi Azərbaycan təmsilçisi “Şamaxı”ya qarşı 10 nəfərdən ibarət heyətlə mübarizə apardı. Oyun Bakıya səfər edən “şirlər”in 3 qolla 3 xala yiyələnməsiylə sona çatdı. Bununla “İrəvan” liderlik uğrunda mübarizədən qopdusa, Vüqar Əsgərlinin yetirmələri irəli düşdü.

Tura Binədə yekun vuruldu. Burda MOİK “Mingəçevir”lə üz-üzə gəldi. Ev sahibləri ötən tur lider olduğundan, taxt-tacı əldən vermək istəmirdi. Ortabab qonaqlar isə qalib gəlib sensasiyaya imza atmağı hədəfləmişdi. Lakin ordu klubu buna imkan vermədi. Bölgə təmsilçisini 3:0 hesabıyla məğlub edən “hərbçilər” şəriksiz birinciliyini möhkəmləndirdi. Buna baxmayaraq, onlar sayıqlığı əldən verməməlidi. Çünki turnir cədvəlinin yuxarı pillələrindəki sıxlıqdı, komandalar arasında xal fərq azdı.

1. MOİK 6 4 2 0 15-5 14
2. Qaradağ Lökbatan 6 4 1 1 8-4 13
3. Şamaxı 6 3 2 1 20-8 11
4. İmişli 6 3 1 2 10-5 10
5. İrəvan 6 3 1 2 11-6 10
6. Karvan 6 2 2 2 9-8 8
7. Mingəçevir 6 2 1 3 7-12 7
8. Zaqatala 6 1 3 2 7-8 6
9. Araz Saatlı 6 1 0 5 5-24 3
10. Difai Ağsu 6 0 1 5 2-14 1

Bombardirlər: Elşad Tağıyev (Şamaxı) – 6, Emin Zamanov (Şamaxı) – 5.
Növbəti turun oyunları noyabrın 1-2-də keçiriləcək: Şamaxı – Difai Ağsu, Mingəçevir – İrəvan, İmişli – Zaqatala, Araz Saatlı – Karvan, Qaradağ Lökbatan – MOİK.

KƏNAN BAHADIR