Dünən 1-ci liqada yeni mövsüm start götürdü. İlk oyunda Yevlaxda yerli komanda “Karvan” “Mingəçevir”i qəbul edirdi. Oyuna marağını nəzərə alaraq, bəndəniz də Yevlaxa yollandı.

Rayonun stadiona yaxın ərazilərində oyuna maraq hiss olunurdu. Lakin Azərbaycan futbolunun ənənəvi qaydası olan müəllimlərin, dövlət işçilərinin görüşə gətirilməsinə şahidlik etdik. Hakimin start fitinə 20 dəqiqə qalmış arenaya çatdıq. Maraq məqam budu ki, oyuna PFL-in mətbuat xidmətindən və “Futbol+” qəzetindən başqa heç kim maraq göstərməmişdi. Ölkədəki peşəkar liqaları təşkil edən qurum görüşə çox əla hazırlaşmışdı. PFL-ə məxsus “1-ci liqa/ 2-ci liqa” adlı “yutub” kanalında canlı yayınlanan oyunun tanınmış telejurnalist Ceyhun Rzayev stadiondan canlı şərh edirdi.

Oyunu izləyənlər arasında Yevlax rayon icra başçısının müavinləri, YAP-ın Yevlax şəhər aparatının rəhbəri, şəhər ictimaiyyətinin nümayəndələri də var idi. PFL prezidenti Elxan Səmədov, vitse-prezident Aslan Şahgəldiyev, texniki-idman direktoru Elgiz Abbasov da stadiona təşrif buyurmuşdu.
Düz saat 16.30-da hakim Rövşən Rəcəbovun start fiti səsləndi. İlk dəqiqələrdən meydan sahibləri daha üstün oyun sərgilədi. Bəzi məqamda “şəhərlilər” əks-hücumlarda rəqibi tutmağa çalışırdı. Lakin “Karvan”ın müdafiəsi etibarlı oynadı. Ara-sıra futbolçular arasında xırda problemlər yaransa da, referi vəziyyətə nəzarət edə bilirdi. Qarşılaşmada maraqlı məqamlar isə 45-ci dəqiqədə yaşandı. Referi “Mingəçevir”in qapısına penalti təyin etdi. Zərbəni dəqiq yerinə yetirən Akif Tağıyev hesabı açdı. Bununla da komandalar fasiləyə yollandı.

İkinci hissəyə “ağ-qaralar” istəkli başladı. Yevlaxlıların heyətində Peter Kinqslə Anqenor Qnapi qonaqların müdafiəsinə problem yaradırdı. Kənan Kərimovun komandası iki dəqiqəyə 2 qol vurmaqla hesabı 3:0 etdi. Bir-birinin ardınca İzzət Müştaqovla Elvin İsmayılov fərqləndi. Qoldan sonra meydanda dava düşdü. Meydan sahiblərinin kapitanı Müşfiq Teymurov qonaq azarkeşlərə ədəbsiz jest etdi. Mingəçevirli futbolçular buna dözməyərək onun üzərinə şığıdılar. Oyunun təxminən 7-8 dəqiqəsi dava-dalaşla keçdi. Yekunda Rövşən Rəcəbov “Karvan”dan Muşfiq Teymurovu, “Mingəçevir”dən isə Elçin Qasımovla Elvin Əlizadəni qırmızı vərəqə ilə cəzalandırdı.

Ehtiraslar sakitləşəndən sonra qonaqlar hücuma atıldı. Bunun nəticəsində Samir Məmmədovun yetirmələri hesab arasında fərqi azaltdı. 71-ci dəqiqədə Elnur Mirzəyev “şəhərlilər”in mövsümdə ilk qolunu vurdu. Lakin qonaqların gücü bura qədər imiş. 9 nəfərlə mübarizə aparmaq komandaya əlavə əziyyət verirdi. Yevlaxlılar isə qoldan doymurdu. 88-ci dəqiqədə Peter Kinqs yekun hesabı müəyyənləşdirdi. Oyun başa çatandan sonra hər iki komandaların üzvləri bir-biri ilə görüşərək xoşluqla ayrıldı. Hətta hər iki kollektiv öz azarkeşlərinə minnətdarlıq bildirmək üçün alqışladılar.

Bununla da 1-ci liqada yeni mövsümə start verildi. Dava-dalaş olsa da, stadionun ot örtüyü yağış səbəbindən pis günə qalsa da, ümumilikdə maraqlı oyun izlədik. Ümid edirik ki, digər oyunlar da belə gərgin və baxımlı keçər.

İLKİN SULTANLI, Yevlax