"Football-plus.az" xəbər verir ki, komandanın oynayan məşqçisi Fərid Ələkbərov görüş barədə "azfutzal.az"a açıqlama verib. O, məğlubiyyəti belə şərh edib:
“Bosniya və Hersoqovina çempionu bizimlə görüşə tam heyətlə çıxmışdı. Belə ki, onların əsas oyunçusu Pereç qırmızı vərəqə aldığına görə I turda “Piast”la matçı buraxmışdı. Oyunun gedişində hesabda önə keçdik. Ancaq oyun təcrübəsizliyi sözünü dedi və üstünlüyümüzü qoruya bilmədik. İstər fiziki hazırlıq, istərsə də qol epizodu yaratmaq baxımından komandamız yaxşı tərəfdən seçilirdi. Hesab 2:2 olan vaxt boş qapıya düşə bilmədik. Onu edə bilsəydik, qələbə qazanmaq şansımız az deyildi. Ümumiyyətlə, qrupumuzdakı rəqiblərin heç biri zəif, asan udulacaq kollektiv deyil. Hər biri oturuşmuş heyətə malikdi, əksəriyyəti illərdi eyni komandada çıxış edir. Bizim bir gün əvvəl yendiyimiz “Uypeşt” meydan sahibi və qrupun əsas favoriti hesab edilən “Piast”la heç-heçə etdi".
Ələkbərov "Araz-Naxçıvan"ın turnirdə kifayət qədər yaxşı mübarizə apardığını deyib:
"Qrup liderinin kimliyinə sonuncu turun oyunlarından sonra aydınlıq gələcək. Elə vəziyyət yaranıb ki, bu hüququ hər komanda qazana bilər. “Araz-Naxçıvan” bu ildən sırf yerli futzalçılardan – millinin üzvlərindən qurulub. Onların belə mübarizə aparacaqlarını açığı gözləmirdim. Yaxşı mənada təəccübləndirdilər”.
“Araz-Naxçıvan” qrupun ilk oyununda “Uypeşt”i 5:4 hesabı ilə yenib, “Buba Mara”ya isə 3:5 hesabı ilə uduzub. Komanda sabah “Piast”la üz-üzə gələcək. Oyun saat 22.00-da start götürəcək.
