“Neftçi” çempionatda bürünc medalı təmin edib, ölkə kubokunda isə finala vəsiqə qazanıb. Lakin azarkeşlər komandanın nəticələrindən narazıdı. “Şamaxı” ilə görüşdə də bu tendensiya aşkar hiss olundu. Protokolda 600 azarkeşin oyunu izlədiyi qeyd olunsa da, əslində bu say 400-500 olardı.

Laurentsiu Regekampf heyətdə dəyişikliklər etmişdi. Azər Əliyevin zədəli olması Salahlının işinə yaramışdı. Stankoviçin cəzalı olması səbəbindən isə Mərt müdafiənin mərkəzində çıxış edirdi. “Şamaxı”da, demək olar ki, hər şey qaydasında idi. Qarşılaşmaya meydan sahibləri istəkli başladı. İlk 15 dəqiqədə flaqman yaxşı oyun sərgiləyirdi. 11-ci dəqiqədə Əliyar Ağayev “ağ-qaralar”ın xeyrinə penalti də təyin etdi. Lebonun zərbəsindən sonra Zahid topa əllə müdaxilə etdiyi üçün referi “nöqtə”ni göstərdi. Topun başına keçən Eminin zərbəsi öncə dirəyə, sonra Rəşada toxunaraq tora daxil oldu.

Qoldan sonra “Şamaxı” çökmədi. Əksinə, “şirlər” daha istəkli oynamağa başladı. Qonaqların heyətində ən çox fəallıq göstərən isə kapitan Elvin Məmmədov idi. Düzdü, “ağ-qaralar” hərdən təhlükəli hücumlar qururdu. Hətta bir epizodda Eddinin zərbəsi tirdən qayıtdı. Bütün bunlara baxmayaraq, fasiləyə kimi başqa qol vurulmadı.

İkinci hissədə “Neftçi”nin sönük oyun sərgilədiyini görən şamaxılılar hücuma aludə oldu. Bu da işə yaradı. 55-ci dəqiqədə Mərt görüşün ən yaxşılarından olan Elvinə qarşı cərimə meydanında kobud oynadı. Əliyar Ağayev bu dəfə də “nöqtə”ni göstərdi. Topun arxasına keçən Yunanov isə dəqiq zərbə ilə hesabı bərabərləşdirdi. Görüşün sonuna kimi hər iki komandanın qol imkanı olsa da, heç biri fərqlənə bilmədi. Beləliklə, bu nəticə ilə “Şamaxı” premyer-liqada qalmaq şansını saxladı. “Neftçi” isə azarkeşlərini özündən küsdürməyə davam edir.

Gözdən qaçmadı
* Emin Mahmudov penaltini vurandan sonra azarkeşlərə əli ilə “sakit olun” işarəsi göstərdi.
* 88-ci dəqiqədə Kenni Sayeflə Arsen Ağcabəyov arasında problem yaşandı. İsrailli futbolçu “Şamaxı”nın müdafiəçisini qıcıqlandırdı və bundan sonra onlar arasında çəkişmə baş verdi. Oyuna yeni qoşulan Rauf Hüseynli aranı sakitləşdirmək istədi. Lakin Arsen ona da əsəbləşdi. Rauf isə komanda yoldaşını qucaqlayaraq məsələnin böyüməsinə imkan vermədi.
* Oyundan sonra “Neftçi”nin futbolçuları “Forza Neftçi”yə tərəf getdi. Bu zaman azarkeşlər onlara arxa çevirdi.

Maraqlıdı...
Premyer-liqanın 2022/23 mövsümündə 17-ci avtoqol qeydə alındı. “Neftçi” – “Şamaxı” oyununda qonaqların qapıçısı Rəşad Əzizli ehtiyatsızlıqdan topu tora saldı. Buna qədər cari mövsümdə 16 avtoqol olmuşdu. Bununla da ölkə çempionatları tarixinin antirekordu təkrarlandı. 1992-ci ildən keçirilən yarışda ən çox avtoqol 2014/15 mövsümündə yaşanmışdı. Həmin vaxt 17 avtoqol qeydə alınıb. Bu antirekord 8 ildən sonra təkrarlandı.

İLKİN SULTANLI