Şamaxıda keçirilən oyun təhlükəli vəziyyətlərlə zəngin olmadı.

İlk 15 dəqiqə, demək olar ki, kəşfiyyat xarakteri daşıdı. Hər iki komanda daha çox topa nəzarət etməyə, ərazi üstünlüyünə yiyələnməyə çalışırdı ki, bu da heç birində alınmadı. Mübarizə əsasən meydanın mərkəzində gedirdi. Qonaqlar uzun ötürmələr hesabına hücum qurmağa çalışsa da, istəklərini reallaşdıra bilmirdilər. “Şirlər” isə pressinq sayəsində rəqibi ikinci zonada qarşılayaraq xırda ötürmələr sayəsində Tərlan Əhmədlinin qapısna yaxınlaşmaq istəyirdi. Birinci hissənin axarından hiss olunurdu ki, qarşılaşmanın taleyini bir qol həll edəcək. Bunu bacaran komanda hesabına 3 xal yazdıracaq. Yeri gəlmişkən, tovuzluların əvvəlki Şamaxı səfərləri uğurlu alınmışdı. Ayxan bəyin yetirmələri birinci dövrədə meydan sahiblərini minimal hesabla yenmişdi. Elə ölkə kubokunda da “Şamaxı”nı mübarizdən kənarlaşdıran tovuzlular olmuşdu. Həmin matçın taleyini son dəqiqələrdə vurulan bir qol həll etmişdi. Bu dəfə də faktiki eyni ssenari yaşandı. Ancaq qol sonda yox, ikinci yarının əvvəlində, daha dəqiqi, 55-ci dəqiqədə vuruldu. Oyunun ən yaxşısı olan Quseynovun kornerdən qapı önünə asmasını Tərlan Quliyev başla dəqiq tamamladı. Hesabda geri düşən “şirlər”in məşqçilər korpusu əvəzetmələr hesabına hücumu gücləndirməyə çalışsa da, dönüş etmək mümkün olmadı. Nə təcrübəli Elvin Məmmədov, nə də Amil Yunanov gözləntiləri doğrultdu. Qonaqlar müdafiədə intizamlı oyunla sona qədər qələbə hesabını qoruya bildilər. Minimal qələbə sayəsində Tovuz təmsilçisi ən yaxın izləyicisi “Şamaxı”dan bir qədər də uzaqlaşdı.

Gözdən qaçmadı
* Matçın əvvəlində bilindi ki, rabitə olmaması səbəbindən VAR-dan istifadə etmək mümkün olmayacaq.
* Şamaxıda keçirilən qarşılaşmaya Gəncədən də qonaqlar gəlmişdi. “Kəpəz”in aşağı yaş qrupunda çalışan İlham Səmədov qış fasiləsində Gəncə klubunu “şirlər”ə dəyişən oğlu Əli Səmədovun oyununu izləmək üçün uzun yol qət etmişdi. Onunla yanaşı, “sarı-göylər”in mühafizə xidmətinin rəhbəri Elmar Əliyev də qədim Şirvan elinə təşrif buyurmuşdu.
* Matçdan sonra “Turan Tovuz”un azarkeşlərlə əlaqələndiricisi Kamal Saqqayevin halı pisləşdiyindən həkim köməyinə ehtiyac duyuldu. Stadiondakı tibb işçiləri Kamala iynə vurandan sonra tovuzlu azarkeşin durumu düzəldi.
* “Turan Tovuz”un mətbuat katibi Süleyman Tağıyev Şamaxıya gəlməmişdi. Bu üzdən Ayxan Abbasovun iştirakı ilə keçirilən mətbuat konfransında da jurnalistləri “Şamaxı”da eyni vəzifəni icra edən Yusif Hüseynov salamladı.
* İlk yarıda qonaqların müdafiəçisi Xulu Siyanda ard-arda “Şamaxı”nın oyunçularına qarşı kobud oynayınca, tribunada əyləşən yaşlı azarkeşlərdən biri gözlənilmədən Ayxan bəyə səsləndi: “Ayxan, bunu hardan gətirmisən? Bizim uşaqları şil-küt edəcək, çıxar onu meydandan”. Azarkeşin sözləri gülüşlə qarşılandı.

RƏŞAD