Rəşad Sadıqovun mətbuat konfransını izləyənlər və ya oxuyanlar elə düşünə bilər ki, “Zirə” 90 dəqiqə ərzində “Şamaxı” üzərində üstün oyun sərgiləyərək 2 xal itirdi.

Əslində isə belə olmadı. Düzdü, ilk yarıda bakılılar üstün oyun sərgilədi. Top, demək olar ki, həmişə “qartallar”ın futbolçularında idi. Lakin qola kimi “Şamaxı”dan Fuadla Əli uzaqdan zərbələrlə bəxtini sınamışdı. “Zirə” isə ilk təhlükəli hücumda hesabı açdı. 29-cu dəqiqədə künc zərbəsindən ötürülən top müdafiəçilərindən geri döndü. Hamdauinin qapıya göndərdiyi “dəri kürə” Keytanın önünə düşdü. Fransalı topu qapıdan keçirməkdə çətinlik çəkmədi.

Fasilədən sonra da “Zirə” topa daha çox nəzarət edirdi. Şamaxılılar isə əks-hücumlara və standart vəziyyətlərə bel bağlamışdı. 57-ci dəqiqədə Fuadın cərimə zərbəsindən ötürməsi zamanı Çantakias Cəlala qarşı qaydanı pozdu. Hakim oyunu davam etdirsə də, VAR-dan gələn siqnaldan sonra penalti təyin etdi. Amil zərbəni dəqiq yerinə yetirərək hesabı bərabərləşdirdi.

Bundan sonra “Zirə”nin futbolçuları özünü itirdi. Onlar adi ötürmələrdə səhvə yol verirdi. Belə məqamların birində “şirlər” önə keçdi. 73-cü dəqiqədə Fuad cərimə meydançasına asma etdi. Mehdinin topa çıxdığını görməyən Hamdaui Kamrana “məhsuldar ötürmə verdi”. Forvard isə topu boş qapıdan keçirdi. Qoldan sonra “Zirə” toparlanmağa çalışdı. Rəşad Sadıqov Coşqunu Eldarla əvəzlədi. Mərkəzdə fəallığı artırmaq istəyən məşqçi 2 dəqiqə sonra istəyinə çatdı. Mərkəzdən başlayan hücumu Qomes davam etdirdi. Onun ötürməsindən sonra Nihad topa uğursuz şəkildə toxunmaqla avtoqola səbəbkar oldu. “Zirə” qələbə də qazana bilərdi. İmkanların birindən Keyta, digərindən Rüstəm yararlana bilmədi.

Beləliklə, matç 2:2 bitdi, “Şamaxı” “Sabah” üzərindən qələbədən sonra “Zirə”ni də büdrətdi.

Gözdən qaçmadı

* İlk hissənin əvvəllərində stadionda əyləşən azarkeşlərdən biri Rəşad Sadıqovdan “Neftçi” ilə bağlı nəsə soruşdu. Gənc məşqçinin cavabı isə belə oldu: “İndi “Neftçi” vaxtdı? İmkan ver, oyunumuzu oynayaq”.

* “Şamaxı”nın futbolçuları 2-ci qol vurulandan sonra iki dəfə yerdə qaldılar. Buna əsəbləşən Rəşad Sadıqov əvvəlcə Coşqun Diniyevə, daha sonra 4-cü hakim Səbuhi Bayramova “tələsdirin onları”, - deyə səsləndi.

* 82-ci dəqiqədə Çantakias səhv ötürmə ilə yadda qaldı. Yunan müdafiəçini Rəşad Sadıqov ingiliscə danladı.

* Avtoqol müəllifi olan Nihad Quliyev meydanı tərk edərkən göz yaşını saxlaya bilmədi. Cavid Hüseynov ona “uşaqsan, nə olub?”, - deyə təsəlli verdi.

İLKİN SULTANLI