Ənvər Əl-Qazi ilə “Maynts-05” arasındakı “döyüşün” belə desək, 3-cü hissəsi başlamaq üzrədi. Bu dəfə Mərakeş əsilli niderlandlı vinger klub tərəfindən müqaviləsi birtərəfli qaydada pozulduğuna görə “karnavalçılar”ı məhkəməyə verib.

"Football-plus.az" xəbər verir ki, söhbət Maynts şəhərində yerləşən əmək məsələləri üzrə məhkəmədən gedir. Məhkəmənin ilk iclasının artıq bu il, dekabrın əvvəllərində keçiriləcəyi gözlənilir. 28 yaşlı futbolçu əvvəlcə “Maynts-05”in müqavilənin pozulmasının konkret səbəblərini ortaya qoymasına nail olmaq niyyətindədi. Bundan sonra isə həmin səbəbin qanuna uyğun olub-olmaması məsələsi həllini tapacaq.

“Bild” nəşrinin yazdığına inansaq, Əl-Qazinin bu klubda illik qazancı 2,5 milyon avro idi və futbolçu bu puldan məhrum edilib. Xatırladaq ki, daha öncə “Ayaks”, “Lill”, “Aston Villa” və PSV kimi tanınmış klubların, eləcə də Niderland yığmasının şərəfini qorumuş Əl-Qazi sentyabrın 22-də Eyndhovendən ayrılaraq azad agent statusunda “Maynts-05”lə ikiillik müqavilə imzalamışdı. Bundan təxminən bir ay sonra, daha dəqiq desək, oktyabrın 15-də, yəni İsrail ilə Fələstin arasındakı münasibətlərin gərginləşməsindən sonra Əl-Qazi “instaqram”da Fələstini dəstəkləyən bir paylaşım etdi. Çox keçmədən həmin paylaşımını sildi. Onun bütün problemləri də məhz bundan sonra başladı. 2 gün sonra rəhbərlik futbolçunun qeyri-müəyyən müddətə məşqlərdən və oyunlardan azad edildiyini, yəni əsas komandadan kənarlaşdırıldığını açıqladı. Oktyabrın sonlarında “Maynts-05” yeni bir bəyanat yaydı. Orda qeyd olundu ki, futbolçuya xəbərdarlıq edilib və o, hərəkətinə görə peşmandı.

Eləcə də Əl-Qazinin tezliklə məşqlərə başlayacağı vurğulandı. Amma Əl-qazi bu dəfə yeni bir paylaşım etdi. Budəfəki paylaşımında o, heç nəyə görə peşman olmadığını, heç kimdən üzr istəmədiyini, əvvəlki fikirlərində qaldığını bildirdi və Qəzzada 3 həftə ərzində 3500-dən çox uşağın öldürülməsinə heç bir izah tapmaq mümkün olmadığını yazdı. Noyabrın 3-də “Maynts-05” təcrübəli oyunçu ilə müqavilənin ləğv olunduğunu açıqladı. Buna səbəb kimi isə onun sosial şəbəkələrdəki paylaşımları əsas gətirildi. Qeyd edək ki, “Bavariya”nın mərakeşli futbolçusu Nussair Mazraui də Fələstinə dəstək verdiyinə görə müəyyən təzyiqlər və problemlər ilə qarşılaşmışdı. Amma Münhen nəhəngi bu futbolçu ilə vidalaşmağı lazım bilmədi.