Oyuna meydan sahibləri daha yaxşı başladı.

“Bayquşlar” cinahlardan tovuzluların müdafiəsini yarmaq istəyirdi. 5-ci dəqiqədə Volkov müdafiənin səhvindən yararlana bilmədi. Onun zərbəsi qapıdan aralı keçdi. “Turan Tovuz” futbolçuları da ancaq müdafiə olunmur, rəqibi əks-hücumlarda cəzalandırmağa çalışırdı. İlk 15 dəqiqəni “Sabah”ın hesabına yaza bilərik. Lakin zaman keçdikcə qonaqlar təşəbbüsü ələ aldı. Ayxan Abbasovun komandası mərkəzdən müdafiənin arxasına və cinahlara ötürmələrlə “Sabah”ı məyus etmək istəyirdi. 19-cu dəqiqədə hesab açıldı. Cərimə zərbəsindən sonra top Ayxanın qarşısına düşdü. Onun asmasını Miller başla qapıdan keçirdi. Meydan sahibləri ofsayd iddiası ilə hakimə etiraz etsələr də, VAR qolu qeydə aldı. Epizodun təkrarını izlədikdə qaydanın pozulmadığı açıq-aşkar görünürdü.

Qoldan sonra “Sabah” hücuma atıldı. Lakin tovuzlular yaxşı müdafiə olunurdu. 31-ci dəqiqədə Volkov yenə müdafiəçiləri qabaqlayaraq qapıya zərbə endirməyə çalışsa da, onun cəhddi baş tutmadı. İlk hissənin son 15 dəqiqəsi tam “Sabah”ın üstünlüyü şəraitində keçsə də, hesab dəyişmədi.

Murad Musayev 2-ci hissəyə iki dəyişikliylə başladı. Namiklə Marqarita Kristianla Nuriyevin yerinə meydana çıxdı. Rusiyalı cinahlardakı basqını daha da artırmaq niyyətində idi. İkinci hissənin ilk 5 dəqiqəsində “bayquşlar” daha çox topa nəzarət etdi. Bundan sonra tovuzlular toparlanaraq hücuma atıldı. Bu da işə yaradı. 56-cı dəqiqədə künc zərbəsinin ardından Şəhriyar fərqi artırdı.

Qoldan sonra bakılılar daha da aqresivləşdi. Lakin Rauf Cabbarov sarı vərəqələrlə onları sakitləşdirirdi. Artıq hər şey tovuzluların istədiyi axar üzrə gedirdi. Meydan sahiblərini əks-hücumda tutmaq da çox asan idi. 78-ci dəqiqədə Pusinin vurduğu qolla Ayxan Abbasovun komandası qələbəni rəsmiləşdirdi desək, yanılmarıq. Burda Şəhriyarın uzun ötürməsini də diqqətdən qaçırmaq olmaz.

Stadionu tovuzlu azarkeşlərin sevinc sədaları bürümüşdü. Haqları da var idi. Sona 10 dəqiqə qalmış komanda 3:0 öndə idi, qonaqlar isə hücumları davam etdirirdi. Beləliklə, həftənin açılış matçından sensasiya yaşandı. “Turan Tovuz” favoritlərdən “Sabah”ı darmadağın etdi.

Gözdən qaçmadı
* Oyun başlasa da, stadiona azarkeş axını davam edirdi. “Sabah”ın mühafizə xidməti onları xüsusi yoxladıqdan sonra arenaya buraxırdı.
* “Sabah” oyunun təşkilində könüllülərin xidmətindən yararlandı. Klub azarkeşlərə pulsuz “Slavyanka” suları da paylayırdı.
* 82-ci dəqiqədə tovuzlu azarkeşlər “Ayxan, sən bizim ürəyimizsən” şüarını səsləndirdilər. Baş məşqçi də əlini ürəyinin üstünə qoyaraq onlara təşəkkür etdi. Azarkeşlər Ayxan bəydən üçlü çəkməyi xahiş etdi. Mütəxəssis onların istəyini yerə salmadı.

İLKİN SULTANLI