Qış fasiləsindən sonra “Neftçi”ni 2, “Qəbələ”ni 3 cavabsız qolla məğlub edən, üstəlik bir gün əvvəl “Qarabağ”ın Gəncədə xal itirməsindən xəbərdar olan “Sabah” meydana yalnız qələbə niyyəti ilə çıxmışdı.

Uzun fasilədən sonra ötən tur evdə “Kəpəz”i minimal hesabla məğlub edən “Səbail” də, çox güman, xal qazanmaq istəyirdi. Ancaq oyun başlayan kimi komandalar arasında səviyyə fərqi üzə çıxdı. Oyuna daha fəal başlayan meydan sahibləri artıq 4-cü dəqiqədə hesabı açdı. Kaşuk irəlilədikdən cərimə meydancasına ötürmə verdi. Təcrübəli Adil Nağıyevin bəsit səhvi Mikelsin hesabı açması üçün kifayət etdi. “Sabah” qoldan sonra da hücumları davam etdirdi. Mikels, Volkov, Kaşuk, Letiç irəlidə fəallığı ilə seçilirdi. 10-cu dəqiqədə Kaşuk – Letiç kombinasiyasının ardından Volkov iki cəhddə topu tora sala bildi. Meydan sahibləri ümumilikdə oyunun axarına nəzarət etsə də, 20-ci dəqiqədə “dənizçilər” “dişini göstərdi”. Rahid cərimə meydançasına asma etdi, De Fransa qarışıqlıqdan istifadə edib topu tora göndərsə də, ofsayd qeydə alındı. 31-ci dəqiqədə olan-qalan intriqa da öldü. Bu dəfə İsayev Kaşuka gözəl ara ötürməsi verdi, ukraynalı isə topu qapı ilə parallel istiqamətdə elə ideal şəkildə göndərdi ki, Volkovun bu topu qola çevirməməsi günah olardı. Gözləmək olardı ki, 3:0-dan sonra meydan sahibləri bir qədər sakitləşəcək. Amma yox, onlar sanki qarşısına hər oyunda qol sayını artırmaq hədəfi qoyub. İrasabalın 68-ci dəqiqədə Zakpaya qarşı aşkar kobudluğa görə birbaşa “qırmızı” ilə meydandan qovulması da “Sabah”ın qol ehtirasını azaltmadı. 79-cu dəqiqədə Əmirquliyev də Apehin qarşısını kobudluqla aldığına görə meydandan qovuldu. Meydanda say bərabərliyindən sonra “tələbələr” yenidən üstünlüyü ələ keçirdi. 83-cü dəqiqədə İsayev – Nuriyev - Apeh “üçlüy”ünün qurduğu hücumu sonuncu dəqiq zərbə ilə bitirdi. Beləliklə, “Sabah” fasilədən sonra keçirdiyi hər oyunda qol sayını artırır – “Neftçi” 2, “Qəbələ” 3, “Səbail” – 4… Amma növbəti turda – “Qarabağ”la oyunda, çətin ki, bu tryuku təkrarlamaq mümkün ola!

Gözdən qaçmadı

* Türkiyədə minlərlə insanın ölümünə səbəb olan dağıdıcı zəlzələnin qurbanlarının xatirəsi oyundan əvvəl birdəqiqəlik sükutla yad olundu. Azarkeşlər də tribunada qonşu-qardaş ölkənin bayrağını və şüarlar açmışdılar.
* Murad Musayev ilk hissədə yetirmələrinə tez-tez “kontrol, control” (nəzarət) deyə səslənirdi.
* 65-ci dəqiqədə Zakpaya qarşı kobudluqdan sonra baş hakim İrasabala sarı göstərdikdə Şahin Diniyev və köməkçiləri kəskin şəkildə etiraz bildirdilər. İnqilab Məmmədov VAR-a baxandan sonra qaydanı pozan futbolçuya göstərdiyi vərəqəni dəyişdi.

ABDULLA İSMAYILOĞLU