"Qəbələ" premyer-liqanın son iki turunda maksimum nəticə göstərməklə 4-cü pillədəki yerini qoruyur.

"Qırmızı-qaralar" bununla yanaşı, ölkə kubokunda çıxışını davam etdirməklə də qiyəmiqyaslı yarışa can atır. "Səbail" isə turnir cədvəlinin dibində olsa da, kubokda əla performans sərgiləyərək "Sabah" kimi iddialı rəqibi mübarizədən kənarlaşdırıb. Amma Şahin Diniyev meydana buraxdığı heyətdə 7 əsas futbolçu yer almamışdı. Odu ki, çoxları meydan sahiblərinin asan qələbə qazanacağını düşünürdü. Amma…

Heç kimin gözləmədiyi halda 9-cu dəqiqədə qonaqlar ilk hücumu qolla tamamladı. İlkin Muradov dəqiq zərbəylə toru sirkələdi. Bir qədər sonra Santosun asması zamanı top De Fransaya dəyərək istiqamətini dəyişsə də, qolkiper qola imkan vermədi. "Səbail", hesabda öndə olmasına rəğmən, meydanın hər qarışında pressinq tətbiq etməklə rəqibə boş zona vermirdi. 20-ci dəqiqədə isə qonaqlar fərqi artırdı. Ruslanın künc zərbəsində cərimə meydançasına asmasına yüksələn Martinov Səlahəti məyus etdi. "Qəbələ" bundan sonra ayıldı və irəli atıldı. Akalın uzaqdan zərbəsi hədəfə düşmədisə, Utiziqin fərqlənməsinə qapıçı mane oldu. Məqsədin asmasına yüksələn Renatonun zərbəsinə də Hüseynəli əla reaksiya göstərdi. Hücumlarını davam etdirən “qırmızı-qaralar” 34-cü dəqiqədə istəyinə çatdı. Ülvinin ötürməsini Utziq çətinlik çəkmədən dəqiq qapadı. Hissənin sonunda isə Ruslanın kornerdən ötürməsini Zakpa qola çevirə bilmədi.

İkinci hissəyə Elmar Baxşıyevin yetirmələrinin fəal qoşulacağı gözlənilsə də, əksi yaşandı. Belə ki, Ruslanın cərimə meydançasına asmasını Kizito qeyri-dəqiq tamamladı. "Qəbələ"də isə Asifin zərbəsini qapıçı iki cəhddə zərəsizləşdirdi. 58-ci dəqiqədə Ruslan Qırtımovdan əla sıyrılıb cərimə meydançasına daxil oldu. Amma Səlahət daha cəld davranaraq təhlükəni sovuşdurdu. Meydan sahiblərindən isə Santosun ötürməsindən sonra nəzarətsiz qalan Allaş əlverişli fürsəti qaçırdı. Bununla belə, 66-cı dəqiqədə Utziq reydini dəqiq tamamlayaraq hesabı bərabərləşdirdi. "Qəbələ" bundan sonra meydanda dominantlıq etməyə başladı. Və 74-cü dəqiqədə Santos uzaq küncü dəqiq nişan almaqla komandasının 3-cü qolunu vurdu. Utziqin fərqi daha da artırmasına isə özlərini zərbəyə sipər edən Cabirə Samir imkan vermədi. Qonaqlardan İlkin də uzaqdan hədəfə düşə bilmədi. Son həmlə zamanı isə Rövlanın zərbəsini Adil blokladı. Beləliklə, geridönüş edən “Qəbələ” aprelin 27-də keçiriləcək cavab matçına bir addım öndə çıxacaq.

Maraqlıdı…
* "Səbail"in qadın azarkeş qrupu 90 dəqiqə ərzində fəal şəkildə dəstəyini nümayiş etdirdi.
* 12-ci dəqiqədə meydana it daxil oldu. İlkin Qırtımov dərhal onu qucağına alaraq uzaqlaşdırdı.
* 75-ci dəqiqədə futbolçuların orucunu açmasına şərait yaradıldı.

ABDULLA İSMAYILOĞLU