Qərb derbisi turun maraqla gözlənilən oyunlarından biri idi.

"Turan Tovuz"un "Kəpəz"i qəbul etdiyi matçda hər iki komandanı xeyli azarkeş dəstəkləyirdi. İlk yarı gərgin mübarizə şəraitində keçdi. Tərəflər hesabı açmaq üçün fürsət axtarır, çəkinmədən irəli atılırdı. İlk təhlükəli vəziyyəti "Kəpəz" yaratdı. Lakin Rüfət Əhmədovun qapı önünə göndərdiyi topu "çərçivə"dən keçirmək mümkün olmadı. Növbəti hücum cəhdində ev sahibləri baş rolda idi. Bu dəfə Fəridin zərbəsi qeyri-dəqiq alındı. Daha sonra Niane hesabı aça bilərdi. O yerdə qalan qapıçının qaçırdığı topu uğursuz toxunuşla meydandan çıxardı. Amma burda "Kəpəz" üçün heyifsilənməyə dəyməz. Çünki yan xətt hakiminin bayrağı havada idi. Martinsin qapıya zərbələrində isə belə hal yox idi. O, iki dəfə qol şansından yararlana bilmədi. Bunlardan birində qeyri-dəqiqlik, digərində Aydının ustalığı önəmli rol oynadı. Ardınca Rodriges Conun qüvvətli zərbısini dəf etməli oldu. Qolkiper hətta zədə riskini gözə alıb rəqibin hesabı açmasını əngəllədi. Birinci yarının sonlarına yaxın "Turan Tovuz" təzyiqi artırdı. Artıq rəqib müdafiə olunmağa məcbur idi. Nəhayət, 45-ci dəqiqədə hesab açıldı. Daha dəqiq desək, Otto Con Millerin uzaqdan ötürməsini "çərçivə"dən keçirməklə tovuzlu azarkeşləri ayağa qaldırdı. “Turan Tovuz” fasiləyə 1:0 öndə yollansa da, "Kəpəz" ilk yarıda zəif təsir bağışlamadı. Düşünmək olardı ki, 2-ci hissə daha rəqabətli keçəcək. Lakin… 54-cü dəqiqədə Miller fərqi artırdı. O, künc zərbəsinin ardından yaranan qarışıqlıqdan məharətlə istifadə etdi. Meydan sahiblərinin növbəti qolunu da çox gözləmək lazım gəlmədi. Cəmi 4 dəqiqə sonra Sərtan Marandiçinin ötürdüyü topu başla qapıdan keçirdi. Bu ərəfədə "Kəpəz"in müdafiəsi aciz görünür, qonaqlar kəsərli hücumlar qura bilmirdi. Onlar sanki 50-ci dəqiqədən sonra oyundan qopmuşdu. Hətta hansısa ciddi rəqabətdən də söhbət gedə bilməzdi. Sadəcə, Kvirkviyanın iki zərbəsinin şahidi olduq ki, birincidə Aydın təhlükəni asanlıqla sovuşdurdu, ikincidə isə top qapıdan keçsə də, gürcü oyundankənar vəziyyətdəydi. 67-ci dəqiqədə hesab arasındakı fərq daha biabırçı həddə çatdı. Paçu Faiqin ötürməsini qola çevirdi - 4:0. Elə burdaca oyunu bitirmək olardı. Bəlkə də tovuzlular artıq Gəncənin qonşuluqda yerləşdiyini xatırlayıb, daha çox qol vurmaq istəmədi…

Gözdən qaçmadı
* "Kəpəz"in icraçı direktoru İlqar Nadiri matçı "stayboks"un çölündən izləsə də, ilk qoldan sonra böyük təəssüf hissi ilə içəri girdi və bir daha çölə çıxmadı.
* Bütün azarkeşlər 44-cü dəqiqədə ayağa qalxdı və "Şəhidlər ölməz, vətən bölünməz!", "Ən böyük əsgər, bizim əsgər!" şüarlarını səsləndirdi.
* Fasilədə "Turan Tovuz"un yeni istifadəyə verdiyi "fanfood"da uzun növbələr yarandı. Onlar arasında "ac olmasaq da, kluba xeyrimiz dəysin" deyən azarkeşlər var idi.
* "Turan Tovuz" azarkeşləri 4-cü qoldan sonra "beş, beş, beş", - deyə tribunaları lərzəyə gətirirdi.
* "Kəpəz"in ən böyük fanklubu "Xəmsə" 70-ci dəqiqədən sonra tribunaları tərk etdi. Onlarla tovuzlular arasında gərginlik yaşanacaqdı ki, tərəflər polisin müdaxiləsiylə sakitləşdi.

KƏNAN BAHADIR