Oyundan öncə onun heç-heçə bitəcəyini təxmin etmək olardı. Qonşu pillələrdə qərarlaşan komandaların bir-birindən ehtiyatlanacağı bəlli idi.

Qarşılaşma da bu tərzdə başladı. Lakin bəzi məqamlarda “Turan Tovuz” azarkeşlərin basqısı ilə hücuma atılırdı. Bəzən isə “Qəbələ” təcrübəli futbolçuların hesabına meydan sahiblərinin qapısı önündə ciddi təhlükələr yaradırdı.

Oyunda hesabı meydan sahibləri açdı. İsnik Alimi cərimə meydançasında Runi Evaya qarşı kobud oynadı. Rauf Cabbarov oyunu davam etdirsə də, Cavid Cəlilov penati təyin edilməsində israr etdi. Beləliklə, meydan sahibləri penaltini dəqiq yerinə yetirən Runinin sayəsində hesabda önə keçdi. Qoldan sonra Elmar Baxşıyevin komandası irəli atıldı. Bu da qonaqların işinə yaradı. 20 dəqiqə sonra Santos hesabı bərabərləşdirdi. Lakin yan xətt hakimi ofsayd qeydə aldı. Və yenə VAR işə düşdü. Cavid Cəlilovun istəyi ilə epizod yenidən izlənildi və qol qeydə alındı.
Fasilədən sonra isə “Qəbələ” daha üstün oyun sərgilədi. “Qırmızı-qaralar”ın bu oyunda 3 xal qazanmamasının tək səbəbi elə futbolçuların özüdü. 2-3 metrdən fərqlənə bilməyən oyunçular “Qəbələ”nin 2 xal itirməsinə səbəb oldu. Beləliklə, görüş 1:1 hesabı ilə başa çatdı. “Qəbələ” növbəti dəfə “Zirə”nin büdrəməsindən ayararlana bilmədi.

Gözdən qaçmadı

* 39-cu dəqiqədə “Qəbələ” rəqibini məyus etdi. Lakin yan xətt hakimi Zöhrab Abbasov oyundankənar vəziyyət qeydə aldı. Cavid Cəlilovun VAR-dan ötürdüyü siqnal zamanı bəlli oldu ki, qol qaydalar çərçivəsində vurulub. Rauf Cabbarov epizodun təkrarını izləyərkən “Qəbələ”nin baş məşqçisi Elmar Baxşıyevin etirazı diqqətdən qaçmadı.
* Oyundan sonra Elmar Baxşıyevlə PFL-in prezidenti Elxan Səmədov uzun-uzadı nəyisə müzakirə etdi.