Qəbələyə qələbə arxasınca yollanan “Neftçi” kəşfiyyata ehtiyac görmədi.

Artıq 2-ci dəqiqədə sol cinahdan rəqibin cərimə meydançasına daxil olan Mirzovun zərbəsindən sonra top az fərqlə qapıdan aralı keçdi. 4-cü dəqiqədə Ozobiç pressinq nəticəsində Aueşeryadan topu “oğurlayaraq” uzaq məsafədən qapını yoxladı. Əslində xorvatiyalı boş qalan komanda yoldaşlarını da görə bilərdi. Ancaq Filip bu epizodda bir qədər xəsislik etdi. 11-ci dəqiqədə meydan sahibləri "ağ-qaralar"ın hücumlarına standart vəziyyətlə cavab verdi. Allaşın ötürməsinə sanki bu topun ona gələcəyini düşünməyən Rauf başla qeyri-dəqiq zərbə vurdu. 12-ci dəqiqədə Brkiçin səhv ötürməsindən sonra Hani topu ələ keçirsə də, qapını dəqiq nişan ala bilmədi. 34-cü dəqiqədə Tamaşdan gələn topu qəbul edən Ozobiçin daha birz zərbəsi qeyri-dəqiq oldu. İlk hissənin son saniyələrində isə Auaşeriya cərimə meydançasına daxilində Haniyə ötürmə verdi, Omarın zərbəsini Brkiç dəf etməyi bacardı. Ümumi götürsək, ilk yarı qarşılıqlı hücumlar şəraitində keçdi. “Ağ-qaralar” 2-ci hissəyə də fəal başladı. Bunun nəticəsi kimi 60-cı dəqiqədə Eminin küncdən ötürdüyü topu Valdes baş zərbəsi ilə tordan keçirdi. 68-ci dəqiqədə topla uzun məsafə qət edən Lebonun vurduğu zərbə Rəşad üçün rahat qənimət oldu. 71-ci dəqiqədə Allaşın küncdən ötürdüyü topa başla zərbə vuran Afriko qeyri-dəqiq oldu. 73-cü dəqiqədə Lebonun ötürməsindən sonra Rəhmanın zərbəsi qapının üstündən keçdi. 77-ci dəqiqədə Eminin rəqibdən aldığı topla irəliləyərk qapıya endirdiyi zərbəni Rəşad iki cəhddə tuta bildi. Matçda meydan sahiblərinin qola yaxınlaşdığı son epizod 87-ci dəqiqəyə təsadüf etdi. Urfanın ötürməsindən sonra Auaşeriyanın zərbəsi qapıdan az fərqlə aralı keçdi. Oyunda son nöqtəni gözəl qolla Rəhman Hacıyev qoydu. O, Caberin ötürməsindən sonra topu saxlamadan Rəşadı məyis etməyi bacardı. Bununla da Elmar Baxşıyevin komandası cari mövsümdə 8-ci dəfə məğlubiyyətlə barışdı. “Qırmızı-qaralar” üçün tunelin sonunda işıq görünmür.

Gözdən qaçmadı
* Zəfər Günü ilə bağlı futbolçular meydana dövlət bayrağının rənglərində olan forma ilə çıxdılar və matçdan əvvəl himnimiz səsləndirildi. “Qəbələ”nin “Red Black Army” azarkeş qrupu Vətən müharibəsində həlak olan qəbələli şəhidlərin pankartını açmışdı.
* Jurnalistlər üçün ayrılan zonada “vay-fay” sistemi işləmirdi. Bu problem yalnız 2-ci hissədə həll olundu.
* Rəhmanın qolundan sonra “Qəbələ”nin azarkeşləri stadionu kütləvi şəkildə tərk etməyə başladılar. Bunu görən “Forza Neftçi” üzvləri “sən Allah, getməyin, bir az mırtlaşaq” şüarını səsləndirdi.
* Oyundan sonra Rəhman Hacıyevlə Qara Qarayev “Qəbələ”nin fanatlarının yanında əyləşən “Neftçi” azarkeşləri ilə şəkil çəkdirdi.

CAVİD ƏLİYEV