Oyunda ilk təhlükəli vəziyyət 11-ci dəqiqədə yaşandı.

Muratanın ötürməsindən sonra Ninqanın iti bucaq altından vurduğu zərbə qapıdan az fərqlə aralı keçdi. 15-ci dəqiqədə Urfan Abbasov rəqibin hücumuna cavab verdi. Onun vurduğu top Mehdinin qoruduğu qapıdan aralı keçdi. 22-ci dəqiqədə qapı qarşısında boş qalan Ninqa Rövlanın ötürməsindən sonra daha bir real qol şansını qaçırdı. 23-cü dəqiqədə Rövlanın ötürməsindən sonra Auşeyra Dossonu qabaqlasa da, topa istədiyi kimi toxuna bilmədiyindən zərbəsi alınmadı. 25-ci dəqiqədə Kamran boş qaldığı epizodda Dossonun ötürməsindən yaralana bilmədi. Əliyevin başla zərbəsi qeyri-dəqiq alındı.

İlk yarıda olduğu kimi, 2-ci hissədə də qarşılıqlı hücumlar davam etdi. 54-cü dəqiqədə Kehatın ideal ötürməsindən sonra Murata topu qapıdan keçirə bilmədi. 63-cü dəqiqədə Ninqanın ötürməsindən sonra Kamranın cərimə meydançasının çölündən vurduğu zərbə tirin üstündən keçdi. Oyunda son real qol vəziyyəti 86-cı dəqiqədə yaşandı. Ülvinin küncə göndərdiyi topu Mehdi zərərsizləşdirə bildi. Oyundan sonra meydan sahiblərinin azarkeşləri komandalarının qazandığı bir xaldan məmnun görünürdü. Elmar Baxşıyevin komandası isə qeyri-sabit çıxışını davam etdirir və turnir cədvəlinin zirzəmisindədi. Görəsən, “Kəpəz” olmasaydı, “qırmızı-qaralar” nə ilə təsəlli tapacaqdı?!

Gözdən qaçmadı
* 35-ci dəqiqədə “Qəbələ” azarkeşləri polisləri aralarında yaşadıqları münaqişəyə görə arenanı tərk elədilər.
* Stadionda olan bütün azarkeşlər 44-cü dəqiqədə “Şəhidlər ölməz, vətən bölünməz” şüarı səsləndirdilər.

CAVİD ƏLİYEV