Ölkəmizi ilk dəfə avrokubokda təmsil edən "Sabah" yetərincə güclü və qitəmiqyaslı yarışlarda təcrübəsi olan rəqib qarşısına çıxmışdı.

Latviya təmsilçisi ötən mövsün Konfrans Liqasının qrupunda çıxış etmişdi. Həmçinin RFŞ son 28 rəsmi oyunda məğlub olmamışdı. İlk 15 dəqiqə “kəşfiyyat” xarakteri daşıdı. İlk qol vəziyyətini rəqib yaratdı. İliç qapını yoxlasa da, Çakla özünü topa sipər etdi. 19-cu dəqiqədə görüşdə ilk yüzfaizlik qol imkanı "bayquşlar"dan gəldi. Amma Anatolinin yaxın məsafədən zərbəsi tirdən qayıtdı. Bu hücumdan sonra bakılılar ruhlanaraq təzyiqi davam etdirdi. Bunu məntiqli nəticəsi kimi 22-ci dəqiqədə Namikin qapı önünə ötürməsini qəbul edən Letiç qarşısıalınmaz zərbəylə hesabı açdı. Qoldan sonra meydan sahibləri təşəbbüsü ələ almağa çalışdı.

İrəliləyən dəqiqələrdə rəqib ard-arda iki standart vəziyyətdə qol imkanı yaxaladı. Bir epizodda rəqibin qapımıza zərbəsinə Çakla sipər oldu. Digər cəhddə isə dirək köməyimizə çatdı. “Sabah”ın cərimə meydançasına növbəti asma zamanı Paniçin zərbəsi qapıdan aralı keçdi. 44-cü dəqiqədə Namik yenidən topu ələ keçirib qapı önündə əlverişli mövqedə olan Letiçi görsə də, sonuncunun zərbəsi hədəfə düşmədi. İlk yarıya əlavə olunan dəqiqədə İliçin cəhdi də qeyri-dəqiq alındı. "Sabah" fasiləyə üstün yollandı.

Qonaqlar 2-ci hissəyə iki əvəzetmə ilə başlasa da, RFŞ daha fəal göründü. Emersonun zərbəsi boşa çıxdı. 48-ci dəqiqədə Savelnieksin cərimə meydançasına asmasına yüksələn komanda yoldaşı zərbə vursa da, Yusif ilk seyvini etdi. Növbəti epizodda küncə zərbəsindən qayıdan topa Emerson qüvvətli zərbə endirsə də, əvvəlcə Da Silva sədd oldu, 2-ci cəhddə isə qapıçı topu tutdu. Rəqib şansları boşa verdiyi vaxtda "bayquşlar" 2-ci qolu vurdu. 56-cı dəqiqədə Tilin qapı önünə asmasına Mikels yüksələrək Volkova assistentlik etdi, gürcü dəqiq baş zərbəsiylə toru silkələdi. Fərq artandan sora Riqa təmsilçisi yenə fəallaşdı. 65-ci dəqiqədə Amin tərs vuruşla az qala avtoqol müəllifi olacaqdı. Növbəti epizoda Mareşin qol cəhdi boşa çıxdı. "Sabah" növbəti qol imkanıyla yerli azarkeşləri həyəcanlandırdı. Alekseyin cərimə meydançasına ötürməsinə yüksələn Da Silvanın zərbəsini qapıçı son anda kornerə çıxardı. Oyuna əlavə olunan dəqiqələrdə meydan sahibləri təzyiqi bir qədər də artırdı. Mareşin cərimə meydançasına asmasına yüksələn Lipuşçekin baş zərbəsini Yusif kornerə çıxardı. Hakimin final fiti "bayquşlar"ın ilk avrokubok qələbəsini rəsmləşdirdi. Belə görünür ki, avqustun 3-də keçiriləcək cavab görüşü formal xarakter daşıyacaq.

Gözdən qaçmadı
* Riqa stadionuna Latviyada yaşayan yüzə yaxın soydaşımız gəlmişdi. Onlar "Sabah", “Azərbaycan” şüarları ilə təmsilçimizi qələbəyə səsləyirdi
* RFŞ ilk yarıda 11 künc zərbəsindən istifadə etdi.
* 74-cü dəqiqədə Paniçlə Apeh toqquşaraq zədələndilər. Bu epizoda görə oyun 4 dəqiqəyə yaxın dayandı. Həkimlərin müdaxiləsinə rəğmən, meydan sahiblərinin oyunçusu əvəzləndi və tezliklə “təcili tibbi yardım” maşını ilə xəstəxanaya aparıldı.

ABDULLA İSMAYILOĞLU